Бишкек шаарында жаңы ден соолукту чыңдоо комплекси жана сейил бак ачылды

Бүгүн, 19-сентябрда Бишкек шаарында Мурман жана Абакан көчөлөрүнүн ортосунда жайгашкан сейил бак менен Алыкулов атындагы ден соолукту чыңдоо комплексинин ачылышы өттү. Бул тууралуу мэриядан билдиришти.

Маалыматка ылайык, комплекстин жалпы аянты 2,48 гектар. Иш-чарага Жогорку Кеңештин төрагасы Нурланбек Тургунбек уулу, Улуттук коопсуздук мамлекеттик комитетинин төрагасы Камчыбек Ташиев, Бишкек шаарынын мэри Айбек Жунушалиев, Кыргыз дзюдо федерациясынын президенти Куванычбек Конгантиев катышты.

Сейил бактын аймагына резина төшөлгөн балдар аянтчасы, воркаут-зона, 810 чарчы метр чуркоо жолу курулуп, 3300 чарчы метр таман таш төшөлдү. Ошондой эле көчөгө отургучтар, жарыктандыруучу чырактар, шахмат столу бар аянтча, жана таштанды урналары орнотулду.

150 даана дарак отургузулуп, автоматтык сугаруу системасы менен 414 даана суу агызуучу жана дренаждык лотоктор орнотулду.

Аталган объект шаарды жашоого ыңгайлуу кылуу, спортту өнүктүрүү жана жашыл фондду көбөйтүү максатында ишке ашырылды.