Биз ал кезде талдай жаш элек,
Аруу элек, сулуу, наз элек.
Он гүлүнүн бири ача элек,
Жакшы ырлардай ширин, наз элек.

Кайырма:
Каректерге кайгы, убайым али ката элек,
Билип, билбей күнөөлөргө дагы бата элек.
Байлык, бийлик, мансап даамын тата элек,
Кандай таза, кандай жаш элек...

Ошондо биз өктөм, жаз элек,
Аруулукка кумар, мас элек.
Жалганчылык жанга бата элек,
Жашоонун шор даамын тата элек...

Кайырма:

Каректерге кайгы, убайым али ката элек,
Билип, билбей күнөөлөргө дагы бата элек.
Байлык, бийлик, мансап даамын тата элек,
Кандай таза, кандай жаш элек...
Жакшы ырлардай ширин, наз элек...

Мейли атак, мейли байлык жыйбасам,
Мен өзүң деп дүйнө кезип ыр жазам.
Мелмилдеген дайра, деңиз суу кечип,
Мелмелжиген далай, далай кырды ашам.

Кайырма:
Сени сүйүп, сен деп күйүп ыр жазам,
Сергектенем сен жөнүндө ырдасам.
Сезимдерге тынчтык бербейт жүрөгүм,
Сени көрүп, сени карап турбасам,
Кагылайын каражаным, кайда жүрдүң мурдатан?

Менден катып жамалыңды бурбасаң,
Мен сендикмин, кайдигерлик кылбасаң.
Мерез болбо, кеч болсо да жолуктук,
Мени ая, ак сүйүүңдү сыйласаң.

Кайырма:

Жагалданып, жалбарганым кыйбасаң,
Жан дүйнөмө кантем анан сыйбасаң?
Жаралгандай бир өзүңдөн бүт аалам,
Жалгыз сага жүрөктөгү сырды ачам.

Кайырма:

Жамгыры коңур күздүн,
Төгүлүп турду бүт күн.
Кол чатыр кармап алып,
Сен мени билем күттүң,
Бүгүн да мени күттүң.

"Жайнаган каректериң,
Карагым келет" дедиң.
А башка сөздөрүңдү,
Укпашым керек менин.
"Дүйнөңүз таптаза экен,
Көзүңүз башкача экен".
Дегенде мен ойлодум:
"Сүйөм деп айтпаса экен".
"Чын эле, чын эле сүйөм" деп айтпаса экен...

Ак жамгыр майдаланып,
Апаппак карга айланып.
Ушул кеч мени күткөн,
Баратты таңга айланып.
"Дүйнөңүз таптаза экен,
Көзүңүз башкача экен".
Дегенде мен ойлодум:
"Сүйөм деп айтпаса экен".
"Чын эле, чын эле сүйөм" деп айтпаса экен....

"Жайнаган каректериң,
Карагым келет" дедиң.
А башка сөздөрүңдү,
Укпашым керек менин.
"Дүйнөңүз таптаза экен,
Көзүңүз башкача экен".
Дегенде мен ойлодум:
"Сүйөм деп айтпаса экен".
"Чын эле, чын эле сүйөм" деп айтпаса экен...

Айылыңдын чебер узу бол, кызым,
Үйүңдүн ырыс, куту бол, кызым.
Кайненең менен кайнатаң үчүн,
Келини эмес, кызы бол, кызым.

Кайырма:
Көшөгөң көгөрсүн, кут түшсүн түнөгүңө,
Кубатым, эстүү бол, нур жаасын жүрөгүңө.
Жан биргем, ырыстуу, ыймандуу бүлө болуп,
Балдарга апа бол, бакыт бол түгөйүңө.

Балдарды суук көздөрдөн өзүң сакта,
Теңирим, жаман сөздөрдөн өзүң сакта.
Экөөнүн бийик сүйүүдөн арзып курган,
Уясын урап-чөккөндөн өзүң сакта.
Кайырма:


Жарыңдын асыл жары бол, кызым,
Үйүңдүн жарык шамы бол, кызым.
Кайын журт сүйгөн, кадырлап күйгөн,
Жашоонун аппак таңы бол, кызым.

Саратан күчөп турганда,
Жамгырды чөлдөр күтүшөт.
Жаз келип сайран курганда,
Ак кууну көлдөр күтүшөт.

Кайырма:
Э-эй, жылмайып жүрөк эргиткен,
Жаныңдан өзүм, садага.
Күтүүсүз келген бакыттай,
Бир келип кетчи Ош жакка.

Суу болуп алып аксам деп,
Мөңгүлөр күндү күтүшөт.
Ааламга жарык чачсам деп,
Жылдыздар түндү күтүшөт.

Кайырма:

Азапка батты жүрөгүм,
Жолугар жомок күндү эңсеп.
Зарыгып күтүп жүрөмүн,
Сүйгөнүм, сендей жанды эңсеп.

Кайырма:

Эңсеген менин жазымсың,
Кел, жаным, көңүл ачылсын.
Ак куудай каалгып учайын,
Буулуккан черлер жазылсын.

Кайырма:

Сагындым го мен сени, кайда жүрөсүң?
Сагынычтан саргайдым, эңсеп жүдөдүм.
Сага деген ак сүйүүм өчпөс түбөлүк,
Сени гана, ардагым, сени сүйөмүн.

Кайырма:
Сени гана эңсеп жүрөмүн,
Сен дегенде ырдайт жүрөгүм.
Эсимдесиң, дайым эсимде,
Сени гана, сени сүйөмүн.

Сенсиз өтпөй күндөрүм, узун түндөрүм,
Сенсиң менин үмүтүм, күдөр үзбөдүм.
Сага деген ак сүйүүм өчпөс түбөлүк,
Сени гана, ардагым, сени сүйөмүн.

Кайырма:
Сени гана эңсеп жүрөмүн,
Сен дегенде ырдайт жүрөгүм.
Эсимдесиң, дайым эсимде,
Сени гана, сени сүйөмүн.

Күттүм сени, күндөр өттү арадан,
Күйүт күчөп, арылбадым санаадан.
Карааныңды күндө эңсеп сагынам,
Айтчы, жаным, анан кантип унутам?

Кайырма:
Күндө тартып сүйүү нурлуу жебесин,
Көз алдымда сенин гана элесиң.
Муңга толгон жүрөгүмдү шаңдантып,
Айтчы, жаным, эми качан келесиң?

Кайда сенин келем деген убадаң?
Күтө берем, ал бир менин убарам.
Чын сүйүүнүн жалындары чачырап,
Илебине күйүп-жанып баратам.

Кайырма:

Кайда кетти, кайда сенин карааның?
Эми сени кайдан издеп табамын?
Бир көрүнүп дартым козгоп жок болдуң,
Жүрөктөгү эски сүйүү жараны.

Кайырма:

Себеленип ойлордун жумшак жамгыры,
Салкын тартып карааның менден узады.
Кетпе алыска, кетпе менин жаштыгым,
Тумчуктурба агызып шарын ызанын.

Жылт эткен жылдыздын үзүгүндөй,
Сен кайда кеткенсиң,
асылкечим?
Жүрөктө толукшуп сүйүү жазы,
Сен качан келесиң,
асылкечим?

Тереңдерден балбылдап сезим бермети,
Ыйык ойлор шыбырын сенден жашырат.
Күнгө умтулган биздеги жашыл өмүргө,
Аппак жаандай тилектер жаап басылат.

Биз бөлүндүк жамгырлуу жаздын түнүндө,
Кош айтыштык апакай кайың түбүндө.
Андан бери жылдар өттү тизилип,
Келатасың ыр болуп менин үнүмө.

Толукшуп турган аскада,
Тоо гүлү белең, жалжалым?
Өзүңдү кыйбай башкага,
Өзүмдү сага арнадым.

Жамгырдан кийин ачылган,
Жаз гүлү белең, жалжалым?
Айтпадым такыр атыңдан,
Аларсың туюп ар жагын.

Турмуштун ыйык гүлүндөй,
Турсунчу гүлүң күбүлбөй.
Жүзүндөн нуруң өчүрбө,
Жүрөйүн сенден түңүлбөй.

Бүгүн үлпөт, бүгүн той, бүгүн шаттык,
Бактыбызды мына ушул үйдөн таптык.
Кел, коноктор, келгиле, төргө өткүлө,
Той эшигин силерге кенен ачтык.

Кайырма:
Ай, жеңелер, тоюңар тойго улансын.

Барган жерден колукту бакыт тапсын,
Келечеги келгин деп эшик ачсын.
Алдын бала, аркасын малы бассын,
Көшөгөсү көргөрсүн эки жаштын.

Кайырма:

Көшөгөсү көргөрсүн эки жаштын,
Алдын бала, аркасын малы бассын.
Коломтодо от жайнап, казан кайнап,
Келген киши ак тойдон даам татсын.

Кайырма:

Мен сага мына минтип жагынайын,
Гүл болуп оң төшүңө тагылайын.
Болбосо бир кичине күнүң болуп,
Бир сенин маңдайыңда жагылайын.

Бак болсоң, мөмөлөрү бышып турган,
Багбаның болоюн мен суусундурган.
Гүл болсоң, кең талаада жайнап турган,
Төгөйүн жамгыр болуп жүзүң жууган.

Көл болсоң, бирде көлкүп, бирде толкуп,
Сүзөйүн толкунуңда ак куу болуп.
Жабыркап жаның кейип турганыңда,
Булбулуң болоюн мен бакка конуп.

Жүрчү, жаным, бул жерден кетеличи,
Махабаттын дайрасын кечеличи.
Өткөн-кеткен капалык унутулуп,
Жетпей жүргөн максаттарга,
Жетпей жүргөн максатка жетеличи.

Качырбачы, көзүңдү качырбачы,
Жашырбачы, жүзүңдү жашырбачы.
Ансыз деле топтолгон кусалыкты,
Арманымды, арманымды,
Арманымды чегинен ашырбачы.

Жүрчү, жаным, бул жерден качалычы,
Кыналышып бир черди жазалычы.
Армандарды жамгырдай төгүп таштап,
Муңга толгон көңүлдөрдү,
Муңга толгон көңүлдү ачалычы.

Ачтым күндөлүк дептерин,
Өткөн күндү мен эстедим.
Ах, чиркин, тунук сезимдер,
Кайдасың жаштык кездерим?

Кайырма:
Барактап ыр дептерин,
Мен жаштыкты эстедим.
Барагы бул өмүрдүн,
Балалыгым эңседим.

Эстей жүр деп сен берген,
Эстелик ыр дептериң.
Эрмеги болду жүрөктүн,
Эстетип сенин элесиң.

Кайырма:

Көңүлүм кыйбайт көңүлүң,
Өтүптүр жаштык өмүрүм.
Көрсөм деп сени кайрадан,
Көксөгөн максат-үмүтүм.

Кайырма:

Кош бол, сүйүү, бир жарк этип жок болгон,
Кош бол, сүйүү, жалын болуп, от болгон.
Кош бол, сүйүү, чагылгандай чарт этип,
Бир дүрт этип, кайра өчүп жок болгон.

Кайырма:
Буулугуп, ыйлап жаттым,
Тагдырга арман айттым.
Сүйүүдөн азап чегип,
Жок окшойт менин бактым.

Кош бол, сүйүү, көп күттүрүп, кеч келген,
Кыска өмүрдө жазым болуп кез келген.
Закым болуп өтүп кеткен махабат,
Эми сени издеп таппайм эч жерден.

Кайырма:

Кош бол, сүйүү, көңүлүмдү жашарткан,
Кош бол, сүйүү, сезимимди тазарткан.
Түбөлүккө кош дебеске аргам жок,
Кутула албай турам эми азаптан.

Кайырма:

Нур болуп келип сулуулап таңды,
Жарыгың күндөй жанды.
Ыр болуп келип аруулап жанды,
Арманым менин барбы?
Ак жарык өңдүү төгүлүп турган,
Жүрөгүм эңсеп, сүйүү сунган.
Ааламда сендей асыл жан барбы?
Ардагым, сендей барбы?

Кайырма:
Эң кымбат, эң асыл адамым сенсиң,
Эркелеп, зор бакыт табаарым сенсиң,
Сагындым, дайрадай агылдым, жаным сага.
Эң кымбат, эң асыл адамым сенсиң,
Эркелеп, зор бакыт табаарым сенсиң,
Сагындым, дайрадай агылдым, жаным сага.

Жарыгым дейин жарыгың кошуп,
Жан-алым неге калбай?
Жаалыным дейин жалының кошуп,
Кумарым сага канбай.
Жаныңда дайым бир болгум келет,
Тагдырым өзүң болдуң демек.
Жан дилим тапкан жаңы ырым созуп,
Ырдаймын жаным сага.

Кайырма:

Сени сүйүп, сен деп жашап кечээ мен,
Сен деп ырдап, сен деп жарым эс элем.
Сенсиз деле жашап жүрөт окшоймун,
Сенсиз менин жашоом бүтөт,
Күнүм бүтөт дечү элем.

Сенсиз деле, сенсиз деле,
Сенсиз деле жашап жүрөт,
Жашап жүрөт окшоймун.

Сенсиз деле таңдар атып, кеч кирип,
Сенсиз деле күн бар экен деп билип.
Сезимимди кытыгылайт жаңы ырлар,
Сага деген сагынычым, кусалыгым эскирип.

Сенсиз менин, сенсиз менин,
Сенсиз менин жашоом бүтөт,
Күнүм бүтөт дечү элем.

Тегеренип, айлар жылга алмашып,
Изибизди жамгыр да жууп, кар басып.
Ташбоор кылып салган бизди убакыт.
Сүйүүбүздү башкаларга, башкаларга арнатып.

Сенсиз деле, сенсиз деле,
Сенсиз деле жашап жүрөт,
Жашап жүрөт окшоймун.

Сенсиз менин, сенсиз менин,
Сенсиз менин жашоом бүтөт,
Күнүм бүтөт дечү элем.

А балким, бүгүн бармын, эртең жокмун,
А балким, бүгүн ачмын, эртең токмун.
Өзүң - мылтык, өмүрүм дүрмөттөлгөн,
Атууга беленденген даяр окмун.

Оюмда кылым басып жашасам дейм,
Ансыз да, оо, өмүрүм, ок сыяктуу.
Тарс этип бир атылсам өзүм жокмун,
Жашоого эч келбеген жан сыяктуу.

Таң калба, сен да мендей пенде жансың,
Бир кезде жок болосуң, азыр барсың.
Пейил күт, мейли өзүңдү айга теңе,
А эртең эрип кетчү жазгы карсың.

Бакта алма гүлүн ачкан эле,
Бак аралап бирге жүргөн кезде.
Батынбастан мен сени сүйөм дешке,
Сүрдөгөнүм менин дале эсте.

Кайырма:

Сүйүү жазым менин, махабатым,
Дарылачы жүрөк жараларын.
Сүйүп калдым сени не кылайын,
Айтчы неге мынча кыйнаганың?

Көрбөй калсам сени сагынамын,
Жаш балача эңсеп, зарыгамын.
Көңүлүмдө бир гана, өмүрүмдө,
Ойлорумда өзүң жүргөнүңдө.

Кайырма

Жалбырактар түшкөн күздү кезип,
Дале жүрөм, жаным, издеп сени.
Жаштык кезден калган жакшы сезим,
Унутулбай калар бизде эми.

Кайырма

Куш болбос, өз тууруна талпынбаган,
Кыз болбос, өз уясын калтырбаган.
Атаке, куштар учкан жолду тиктебей,
Арманым жүрөт ичте айтылбаган.

Кыярбас чынар терек дарагымсың,
Кыйналсам кыяматта таярымсың.
Кызыңа бассаң-турсаң бак тилеген,
Кымбатым атакебай, аярымсың.

Алдыңа башым жөлөп уктаганым,
Ал кезди эстеп-эстеп суктанамын.
Аттиң ай, өз үйүнө конок болгон,
Айылы бөлөк тура кыз баланын.

Аттиң ай, бере албадым жардамымды,
Азайттым мурдагыдан барганымды.
Азыр мен бассам-турсам ойлой берем,
Бактылуу болсо экен деп балдарымдын.