Өзгөн районунда 39 жаштагы жаран балдызынын эки жашар кызын сийип койгону үчүн сабап өлтүрүп салды

Ош облусунун Өзгөн районунда эки жашар наристе токмоктон улам каза болуп калды. Бул тууралуу Ош шаардык жана Ош облустук ички иштер башкармалыгынын маалымат кызматынан 28-октябрда билдиришти. 

Маалым болгондой, 27-октябрда Өзгөн райондук ооруканасынын жандандыруу бөлүмүндө эки жашар наристе каза болуп калганы боюнча милициянын күзөт бөлүмүнө маалымат түшкөн.  

Ыкчам топ окуя болгон жерге барып, издөөнүн жыйынтыгында кыздын өлүмүнө шектүү катары Өзгөн районунун 39 жаштагы К.М. аттуу тургунун колго түшүргөн.  

Кармалган жаран сурак учурунда 26-октябрь күнү саат 20:00 чамасында кыз (балдызынын кызы) сийип койгону үчүн аны тарбиялоо максатында шапалак менен жамбашына уруп койгонун айткан. Андан соң кызды ооруканага жеткиришкен. Дарыгерлер кыз денесинен жана башынан жаракат алганын аныкташкан. Алган жаракатынан улам кыз эртеси күнү каза болуп калган. 

Бул факт боюнча кылмыш иши козголуп, кармалган адам камакка алынды. Учурда тергөө жүрүп жатат. 

Ал эми кыздын апасы 1993-жылы туулган Ж.А. аттуу Өзгөн районунун тургуну, атасы 1984-жылы туулган Кара-Суу районунун А.М. аттуу тургуну экендиги аныкталды. Алар 2015-жылдын март айында ажырашып кетишип, аялы кызы менен эжесинин үйүндө жашап турган.