Жылнаама, 28-ноябрь: Мындан 8 жыл мурун ошол убактагы президент Курманбек Бакиев кызматынан кетип жаткан өкмөт башчы Алмазбек Атамбаевге Данакер орденин тапшырган

* Мындан 8 жыл мурун, 2007-жылы ошол убактагы президент Курманбек Бакиев кызматынан кетип жаткан өкмөт башчы Алмазбек Атамбаевге Данакер орденин тапшырып, аны “жоопкерчиликтүү оппозициянын үлгүсү боло алды” деген.

* Мындан 72 жыл мурун, 1943-жылы союздук мамлекеттердин өлкө башчыларынын (СССР – И.Сталин, АКШ – Ф.Рузвельт жана Улуу Британия – У.Черчилль) Тегеран конференциясы башталган. Бул конференция нейтралдуу аймакта өтүшү керек болгон. Ал үчүн Тегерандан сырткары Каир, Стамбул жана Багдад сунушталган, бирок Сталин учак менен учууга караманча каршы болуп, Тегеранга токтолгон. Ошентип, Сталин конференцияга катышуу үчүн 22-ноябрда поезд менен жолго чыккан.

* Мындан 41 жыл мурун, 1974-жылы XX кылымдын атактуу музыканттарынын бири, “The Beatles” тобунун солисти Жон Леннон акыркы жолу Элтон Жондун концертинде ырдаган. Ал эми 1980-жылдын 8-декабрында Жон Леннонду Нью-Йорктогу үйүнө кире бериштен саат 23:00дүн тегерегинде атып кетишкен. Аны ошол замат шаардагы Рузвельт ооруканасына жеткиришип, бирок көп өтпөй ырчы көз жумган.

* Мындан 9 жыл мурун, 2006-жылы белгилүү орус тасмасы "Он эки отургучта" роль жараткан орусиялык кино жана театр актрисасы Любовь Полищук оор дарттан айыкпай, Москвада каза болгон. Кээ бирөөлөрдүн айтымында, ал оору дал ошол "Он эки отургуч" тасмасына тартылуу убагында алган жаракаттан улам келип чыккан. Ал фильмдин режиссёру Марк Захаров бул пикир менен такыр макул эместигин билдирип, анын себеби катары актрисанын 2000-жылы кабылган жол кырсыгын атап келген.

28-ноябрда кыргыз өлкөсүндө жана дүйнөдө орун алган окуялар тууралуу кененирээк бул жактан окуй аласыздар.