"Кумтөрдө" иштеген чет өлкөлүк жаран чучукту "аттын жыныстык мүчөсү" деп кызматкерлерди катуу нааразы кылды

"Кумтөр" ишканасынын кызматкерлери аталган жайда жетекчилик кызматта иштеген австралиялык Майкл Макфиттин "Фейсбуктагы" өз баракчасына "кыргыздар аттын жыныстык мүчөсүн жегени кезекте турушат" деп чучуктун сүрөтүнө комментарий жазганына нааразычылыгын билдирип чыгышты. Бул тууралуу интернет колдонуучу Турат Бектенов жарыялады.

Бул факт боюнча КРнын Тоо-металлургиялык профсоюзу төмөнкүдөй маалымат таратты: "Келишим түрүндө иштеп жаткан чет өлкөлүк жарандын Жаңы жыл астында чучук жөнүндө айтканынын айынан "Кумтөр" ишканасында жумуш токтотулган. Австралиялык кызматкер Майкл Макфит өзүнүн интернет-баракчасында кыргыз элинин намысына шек келтирген постту жазып, кыргыздын улуттук тамак-ашы болгон чучукту "аттын жыныстык мүчөсү" деп атаган. Бул пост ишкананын кызматкерлерин нааразы кылган, анткени чучук - кыргыз элинин маанилүү жана сүйүктүү тамак-аштарынын бири".

Мындан тышкары профсоюз кечээ, 2-январда кечинде Макфит "Кумтөр" кенинен белгисиз жакка качып кеткенин баса белгиледи. "ИИМдин кызматкерлери аны "Манас" аэропортунан түнкү саат 03:00дө кармашкан. Макфит Кылмыш-жаза кодексинин "улуттук, расалык, диний жана аймактар аралык кастыкты жаратуу" беренеси боюнча айыпталышы мүмкүн",- деп билдирет Тоо-металлургиялык профсоюзу.

Майкл Макфит өз күнөөсүн моюнуна алып, аталган жазуусун жана сүрөттөрүн өчүрүп, жаңы пост жарыялаган. Анда Макфит: "Кыргыз эли жана аттын жыныстык мүчөсү жөнүндө жазганым үчүн чын жүрөктөн кечирим сурайм. Менде кимдир бирөөнү капа кылайын деген оюм жок болчу. Сүрөттөгү адамдардын эч кандай тиешеси жок. Дагы бир жолу кечирим сурайм",- деп жазган.