МЕДИА-ПОРТАЛ: "Бийле" аталышындагы жаӊы клибимди тартууда ата-энем, кайын журтум колдоо көрсөтүп жанымда жүрүштү" дейт Айгерим Расул кызы

Бүгүн, 17-июнда "Медиа-портал" бөлүмү Айгерим Расул кызынын "Бийле" аттуу жаӊы чыгармасынын клиби менен толукталды. Ырчы клип тартуу учурунда ата-энеси, жолдошу, кайын журту колдоо көрсөтүп жанында жүрүшкөнүн, андыктан аларга ыраазычылык билдирерин айтат.

"Клип Ош шаарында тартылды. Режиссёр Нурсултан Кубатов атайын Бишкектен тартуучу тобу менен барып тартты. Бийчилер өзүм түзгөн жаӊы "Ханбийке ханым" тобунун кыздары. Аларды да өзүм даярдап жаттым. Бул үй-бүлөлүк клип десем болот, себеби тартуу учурунда ата-энем, кайын журтум, жолдошум жардамдашып, кеп-кеӊешин айтып жүрүштү. Андыктан аларга ыраазычылык билдирем.

Албетте, чыгармачылыгыма карата түрдүү сын-пикирлер айтылышы мүмкүн. Кудайга шүгүр, кайын журтум аябай түшүнүктүү адамдар. Үйдө келиндик милдетимди аткарам. Ал эми ырчы катары менин чыгармачылыгыма түшүнүү менен мамиле жасап, колдоп турушат", - деп билдирди Айгерим Расул кызы.

Айгерим Расул кызынын "Бийле" ырынын клибин бул жерден көрүӊүз.