Евро-2016: Криштиану Роналдунун жаракат алганына карабай Португалия Европа чемпиону аталды (фоторепортаж)

Футбол боюнча Португалия курамасы тарыхында алгачкы жолу Европа чемпиону аталды. Францияда өткөн Европа чемпиондугунун финалында португалиялыктар Франция курамасын 1:0 эсебинде утуп алышты. Беттештеги жалгыз голду Эдер экинчи 15 мүнөттүктө жаратты.

"Стад-де-Франс" стадионунда өткөн беттештин негизги убактысында 0:0 эсебиндеги тең чыгуу катталды. Оюндун басымдуу бөлүгүн Франция курамасы чабуулда өткөрсө, Португалия курамасы коргонууга ыктап, каршы чабуулда ойноду. Криштиану Роналдунун 1-таймдын башында жаракат алып, майдандан чыгып кеткени оюндун жүрүшүнө таасирин тийгизе алды. Себеби бул көрүнүш франциялыктарга ишеним берсе, португалиялыктар бушайман болушту.

Бирок португалиялыктар лидеринин жоктугун байкатпай, тапшырманы так аткарышты. Кооптуу кырдаалдар кошумча 15 мүнөттүктөрдө көп жаралганын белгилей кетишибиз керек. Бир көрүнүштө Эдер айып соккусун дарбаза устунуна таамай багыттады. Кийинки чабуул менен футболчу оюн эсебин ачты. 25 метр аралыктан узаткан анын соккусун дарбазачы Уго Льорис тосо алган жок.