Бишкекте коомдук унааны күтүп тургандар үчүн аялдамага Wi-Fi орнотулду

Бүгүн, 18-июлда Абдрахманов-Чүй көчөлөрүнүн кесилишиндеги аялдамага Wi-Fi орнотулду. "Акылдуу аялдамалар" долбоорунун алкагында интернет шаар тургундарына жеткиликтүү болуш үчүн орнотулган. "Акылдуу аялдамалар" долбоорунун максаты - коомдо маданиятты өнүктүрүү, жүргүнчүлөрдүн коомдук унааларга түшүп-чыгуусун бир гана аялдамаларда тейлөөнү көнүмүш адатка айлантуу. Интернет менен камсыз кылуу жабдуусу бир убакытта 100дөй колдонуучуну тейлей алат. Бул тууралуу аталган долбоордун автору Курманбек Жаанбаев билдирди.

"Аталган долбоорго Бишкек шаарынын жетекчилиги кызыкдар болсо, долбоор мындан ары жайылышы мүмкүн. Биздин демилгелүү топ кызыкдар жактар менен "Акылдуу аялдамалар" жана "Коопсуз шаар" долбоорун талкуулоого даяр", - дейт Курманбек Жаанбаев.

Ал эми долбоордун дагы бир уюштуруучусу Кирилл Алякин буларга токтолду:

"Дүйнөдөгү Нью-Йорк, Дубай, Москва сыяктуу көп шаарлардын көчөлөрүндө бекер Wi-Fi кызматы орнотулган. Эмне үчүн Бишкек шаарында да орнотууга болбосун деп ойлодук. Жыйынтыгында бүгүн өзүңүздөр көргөндөй, Абдрахманов-Чүй көчөлөрүнүн кесилишине Wi-Fi кызматы орнотулду. Бул биринчи жай. Жакынкы убакта дагы башка аялдамаларга орнотууну пландап жатабыз".

Жигиттердин мындай демилгесин колдоп келгендердин катарында Жогорку Кеңештин депутаты Жанар Акаев да болду. "Азыр интернетте өздөрү эч нерсе жасабай, көрүнгөндү талкуулап, сын айткандар бар. Ал эми Кирилл, Курманбек сыяктуу көптөгөн активист жигиттер мамлекетке кантип пайда келтирүү тууралуу ойлонушат. Мына бүгүн ушундай активист жигиттердин демилгеси менен Wi-Fi орнотулду. Бул башаты гана. Эми келечекте алар акырындап аялдамаларга камераларды, электрондук такталарды, пайдалуу китептердин, сайттардын тизмесин илүүнү пландап жатышат. "Акылдуу аялдамаларды" көбөйтүү шарт. Мындай нерсе, албетте, кылмыштуулуктун алдын алат. Коомго пайда келтирет. Биз мындай балдарды колдоп, үлгү катары көрсөтүшүбүз керек. Андыктан бүгүн жигиттерди колдоо максатында келдим", - деп билдирди Жанар Акаев "Акылдуу аялдамалар" долбоору тууралуу.

Wi-Fi`дын аталышы - Smart_Bus_Stop.

Андан соң "greenlight" деген жазуу чыгат. "Туташтыруу" дегенди басуу керек.

Кызматты пайдалана баштаган интернет колдонуучулар.