Рио-2016: Олимпиадада медаль уткан Иззат Артыков 3,5 миллион сом, 2 батир жана 1 автоунаа менен сыйланат

Кыргыз спортчусу Иззат Артыков "Рио-де-Жанейро-2016" Олимпиадасында коло медаль тагынды. 69 килограмм салмакта ийгилик жараткан спортчуну эми өкмөттүн, Улуттук Олимпиада комитетинин жана Бишкек мэриясынын сыйлыктары күтүп турат.

Спортчуларды Олимпиадага жөнөтүп жатканда Жаштар иштери, дене тарбия жана спорт мамлекеттик агенттигинин директору Канат Аманкулов сыйлыктар тууралуу маалымат берген. Коло медаль алган спортчуларга кандай кызыктыруучу сыйлыктар каралганын эсиңиздерге сала кетели.

Кыргыз Республикасынын Өкмөтү: 3,5 миллион сом өлчөмүндөгү акчалай сыйлык;

Улуттук Олимпиада комитети: Бишкек шаарынан 1 батир жана Toyota Corolla үлгүсүндөгү автоунаа;

Бишкек мэриясы: Бишкек шаарынан 1 батир.

Ал эми спортчунун машыктыруучусуна Улуттук Олимпиада комитети Бишкек шаарынан батир белек кылат жана өкмөт акчалай сыйлык караган.