Москвадагы өрт: "Ушунун баары өлкөбүздөгү коррупционерлердин айынан" дейт Москвадагы өрттөн жакынын жоготкон кыз

Кечээ, 27-августта Москва шаарындагы басмаканада өрт чыгып, анда мекендештерибиз да каза болушту. Окуя болгон жерге маркумдардын туугандары, жакындары барышкан. Алардын күйүтүн чагылдырган видеолор, сүрөттөр интернет ааламын каптоодо. Бул видео да ошолордун бири. Анда жакынын жоготкон кыз ыйлап, өрт өчүрүү кызматкерлери тиешелүү деңгээлде аракет көрүшпөгөнүн, бул окуяда Кыргыз Республикасындагы коррупционерлердин да күнөөсү бар экенин айтат.

"Ал кыз 16-18 гана жашта болчу. Өрт өчүрүүчүлөр бир нече сааттан бери аларды алып чыга элек. Аякта дагы канча адам бар. Эмнеге бул оор?! Алар келип күйүп жаткан имаратты жөн эле карап турушту. Эмне кыларыбызды билбей калдык. Буга ким жооп берет? Мунун баары өлкөбүздөгү коррупционерлердин айынан! Эгер биздин өлкөбүздө баары жайында болсо, биз бул жакка келбейт болчубуз. Биз мекенибизде жашап-иштемекпиз, минтип азап чегип жүрбөйт болчубуз!" - деп ачууланып ыйлайт видеодогу кыргыз кыз.