Екатеринбургда Кыргыз мамлекетинин жараны жаңы төрөлгөн кызын унитаздагы сууга чөктүрүүгө аракет кылган

Орусиянын Екатеринбург шаарында Кыргыз өлкөсүнүн жараны жаңы төрөлгөн кызын унитаздагы сууга чөктүрүүгө аракет кылган. Бул тууралуу бүгүн, 25-октябрда орусиялык маалымат каражаттары жазып чыгышты.

Маалыматка караганда, 23-октябрь күнү саат 16:00 чамасында Екатеринбургдагы соода борборлорунун биринде иштеген кароолчу аялдардын дааратканасынан чырылдаган үндү уккан. Ал дааратканага кесиптеши менен киргенде 22 жаштагы Кыргыз өлкөсүнүн жараны төрөп, жаңы төрөлгөн кызын унитаздагы сууга чөктүрүүгө аракет кылып жаткан. Ал аталган соода борборунун кызматкери экендиги аныкталган. Кароолчу "Тез жардам" кызматын чакырып, ымыркай жана энеси төрөт үйүнө жеткирилген.

"Ооруканадан билдиришкендей, ымыркай мөөнөтүнөн мурда, 2 килограмм 800 грамм салмакта төрөлгөн. Учурда Кыргыз мамлекетинин жараны кызынан баш тартууда. Полицияга бул окуя боюнча арыз түшкөн эмес, бирок кызматкерлер иликтөө ишин жүргүзүп жатышат", - деп жазылат маалыматта.