Интернетте элди бөлүп-жарган деген Таттыгүл Дооталиева жумуштан алынды

Кыргыз мамлекеттик медициналык академиясында окутуучу болуп эмгектенген Таттыгүл Дооталиева интернетте авиакырсыкта каза болгондор тууралуу жазган негативдүү билдирүүлөрү үчүн жумуштан алынды. Бул тууралуу бүгүн, 18-январда SUPER.KG`ге аталган жайдын басма сөз катчысы Абибила Пазылов билдирди.

Анын айтымында, Эмгек кодексинин 83-беренесинин 8-пунктуна ылайык (тарбия берүүчү функцияларын аткарган кызматкердин адепке туура келбеген жоругунан улам бул жумушун уланта албайт), ректордун буйругу менен жумуштан бошотулду.

"Тарбия иштери менен алектенген адам коомдук адепке туура келбеген, авиакырсыкта каза болгондордун дарегине түрдүү билдирүүлөрдү айтканына байланыштуу жумуштан алынды", - деп билдирди Пазылов.

Белгилей кетсек, 16-январдагы кырсыктан соң Таттыгүл Дооталиева Фейсбуктагы баракчасына мерт болгондор өлкөнүн түштүк аймагынан экенин айтып, “өздөрүнөн көрсүн” деген өңүттө пикир калтырган. Кийинчерээк анын Медициналык академиянын окутуучусу экени аныкталган. Ошондой эле кечээ, 17-январда УКМК Дооталиеванын Фейсбуктагы билдирүүсү текшерилип жатканын, анын жыйынтыгында укуктук баа берилерин билдирген.