Өкмөт: "Боинг кырсыгынан каза болгондордун туугандарынын өтүнүчү менен жардам катары берилген акча каражатынын суммасы айтылбайт"

Курулуш башкармалыгынын дачалары (Дача Су) айылындагы Боинг кырсыгынан каза болгондордун туугандарына, жабыркагандарга жана жергиликтүү тургундарына акчалай каражатты бөлүштүрүү боюнча өкмөт түшүндүрмө берди. Анда жабыркагандардын жеке өтүнүчү менен алардын коопсуздугун эске алуу максатында акчалай жардам алгандардын аты-жөнүнүн тизмеси жана акча каражатынын суммасы көрсөтүлбөй турганы айтылат. Бул тууралуу 6-майда өкмөттүн басма сөз кызматы билдирди.

Маалым болгондой, жабыркагандар аларды тоноо окуялары катталышы мүмкүн деп чочулашууда.

"Өкмөттүк комиссия тарабынан тиешелүү органдарга жабыркагандардын коопсуздугун камсыз кылуу тапшырмасы берилди. Аны менен бирге Кыргыз Республикасынын Өкмөтү каза болгондордун туугандарына жана жабыркагандарга турак жай алуу үчүн берилген акча каражаттарын максаттуу пайдаланууну сунуштайт. Азыркы кезде 7 жаран турак жай сатып алды. Учурда Өкмөттүк комиссия Түркия тарап менен каза болгондордун жакындарын жана жабыркагандарды колдоо иретинде төлөнүүчү компенсация боюнча активдүү сүйлөшүүлөрдү жүргүзүүдө. Сүйлөшүүлөрдүн жыйынтыгында өкмөттүк комиссия өлкө коомчулугуна толук маалымат берет", - деп айтылат маалыматта.

Буга чейин учак кырсыгы болгон айылдын тургундарына бир жолку материалдык жана моралдык колдоо түрүндө 5 миллион сом бөлүнгөнү айтылган. Өкмөттүн басма сөз кызматынын маалыматы боюнча бир үйдө жашаган бир нече үй-бүлөлөр (туугандар) ар бирине өз өзүнчө компенсация берүүнү талап кылышууда.