Депутат Бокоев: “Буудайды импорттоого салыкты алып салуудан бюджетке 650 миллион сом түшпөй калды”

“Буудайды импорттоого кошумча нарк салыгын алып салууга кимдин кызыкчылыгы бар?” - деп бүгүн, 8-июнда парламент жыйынында "Республика - Ата Журт" фракциясынан депутат Кенжебек Бокоев кызыкты.

Анын айтымында, ата мекендик буудай өндүрүүчүлөрүн колдоо максатында буудайды алып кирүүгө кошумча нарк салыгын киргизүү сунушталып жатат. "Кошумча нарк салыгын алып салып жатканда, өкмөт нанга болгон баа арзандайт деп убада берди эле. Бирок нан арзандаган жок. Мындан улам бюджеттен 650 миллион сом жоготтук. Бул каражатка 20 мектеп курууга болот эле. Салыкты алып салуу боюнча мыйзамдын өткөнүнө бир жарым жыл болду. Ошондо 30 мектеп курмакпыз. Эмне үчүн, кимдин кызыкчылыгы үчүн мындай мыйзам киргизилди?” - деп нааразы болду депутат.

Ошондой эле анын мыйзам долбоору эки комитеттин кароосуна жөнөтүлгөнүнө да нааразычылыгын билдирди.