Түркмөнстанда социалдык тармактарга кирүүгө тыюу салынды

"Түркмөнстандын альтернативдүү кабарлары" басылмасы жазып чыккандай, ушул айдын башынан баштап, Түркмөнстанда "Одноклассники" социалдык тармагындагы видеофайлдарды ачуу мүмкүнчүлүгү жоюлган. Аталган маалыматта жазылгандай, учурда өлкө жарандары мультимедиалык файлдарды кенен-кесири ачып көрө алышпайт. Бул боюнча аталган басылма жана "Азатлык" басылмасы "Түркмөнтелеком" мамлекеттик компаниясы провайдерлер үчүн интернеттин ылдамдыгын төмөндөтүп жана чектеп койгону үчүн ушинтип жатат деген пикирди жазып жатат.

Түркмөнстандын байланыш министрлиги бул чектөөлөргө жүйөлүү себептерди атай элек. Аларга кайрылган жарандарга жана тараптарга министрлик "социалдык тармактарга жол ачылбайт, себеби силер туура эмес сайттарга кирип жатасыңар!" - деп кескин жооп берген.

Түркмөнстан медиа жаатындагы эркиндик боюнча төмөнкү саптарда турат. Ал эми президент Гурбангулы Бердымухамедовду эл аралык уюмдар "Интернеттин душманы" деп атап алгандары бар деп жазат "Азатлык".

Түркмөнстанда көз карандысыз маалымат агенттиктерине, популярдуу социалдык тармактарга, Facebook, ВКонтакте, WhatsАpp жана башка тармактарды колдонууга тыюу салынган.