Бишкек-Ош унаа жолунда жол кырсыгы катталып, 8 адам каза болду (фото)

Бишкек-Ош унаа жолунда жол кырсыгы катталып, 8 адам каза болду. Бул тууралуу бүгүн, 20-июлда Өзгөчө кырдаалдар министрлигинен билдиришти.

Маалыматка караганда, жол кырсыгы бүгүн эртең менен саат 06:00 чамасында Бишкек-Ош унаа жолунун 460-чакырымында болгон. Анда оор жүк ташуучу жана эки жеңил унаанын катышуусунда жол кырсыгы катталган.

"Жол кырсыгынан 8 адам каза болуп, 3 адам оор жаракат алышкан. Хонда Одиссей унаасында 6 адам, оор жүк ташуучу унаада 2 адам болгон. Учурда алардын абалдары канааттандырарлык. Ал эми Хонда Степвагон унаасындагы 9 адамдын 8и (4 эркек, 3 аял, 5 жаштагы кыз) окуя болгон жерден каза болуп, айдоочусу Шамалды-Сай шаардык ооруканасына "Тез жардам" унаасы менен жөнөтүлгөн, абалы оор. Каза болгон адамдардын аты-жөнү такталууда", - деп айтылат ӨКМнын маалыматында.

Саламаттыкты сактоо министрлиги айдоочунун абалы оор экенин, баш мээсинен катуу жаракат алганын кабарлады.