ТЕСТ: Дүйнөдөгү байлар кантип байышкан же алар төрөлгөндө эле бай болгонбу?

Чыныбай Турсунбековду көпчүлүк “Акун” деп таанышат. Анткени Кыргызда ушундай аталыштагы ун азыктарын жатка билбеген жан болбосо керек. Кесиби боюнча филолог Чыныбай мырзанын байлыгы кызыл дан түшкөн тегирменде.

Кыргыз өлкөсүндөгү эң бай адамдардын бири катары Өмүрбек Бабанов айтылып келет. Анын айтымында, окуу жайды бүткөн соң бизнес менен алектене баштаган. Кийин өлкөдөгү күйүүчү май таңсыктыгы болуп жаткан убакта Казакстандан бензин ташыган.

Алишер Усманов бизнеске карай жолду 1987-жылы полиэтилен баштыктарын чыгарып сатуудан баштаган. Андан соң тамеки бизнесин колго алып, кийин баалуу кагаздар, металлургия, нефтини кайра иштетүүгө өткөн.

Дональддын атасы Фред Трамп Нью-Йоркто курулуш бизнеси менен алектенген. Ошол учурдагы ийгиликтүү ишкерлерден болгон. Дональд Трамптын өмүр баяны башка бай адамдардыкына окшош эмес. Ал жарык дүйнөгө келгенде эле миллионер болуп туулган.

Англиялык ишкер Жон Моррис Кларк өзүнө 2 миң доллар акчасы бар компаньон издеп жүрүп, Жон Рокфеллерге жолуккан. Ошол учурда Рокфеллерде болгону 800 доллар болгон. Ал калган акчаны атасынан 10 пайыз үстөк менен бир жылга алып берген. 1857-жылы алар чөп, буудай, эт жана башка товарларды сатышкан.

1995-жылы Жек Ма АКШнын Сиэтл шаарына барган. Анда достору интернеттин кантип иштей турганын көргөзүшкөн. Ошондо издөө системинен Кытай жөнүндө бир дагы маалымат таба алган эмес. Мындан улам Жек Ма веб-сайттарды түзгөн компания ачып, 1999-жылы 17 досу менен бирге Alibaba.com сайтын негиздеген.

Косметикалык гигант L'Oreal компаниясы Лилиан Беттанкурдун атасы тарабынан 1907-жылы негизделген. 15 жашынан тарта атасына кол кабыш кылып, эң алгач флакондорго товардык белги чаптап иштеген.

1996-жылдын күз айларында Стэнфорд университетинин сайтында BackRub аталышындагы издөө баракчасы пайда болгон. Ал ошол университеттин эки аспиранты Ларри Пейдж менен Сергей Бриндин илимий ишинин жыйынтыгы эле. Издөө системин ишке ашыруучу сервер жатаканадагы Бриндин комнатасында жайгашкан.

Карлос Слимдин атасы ишкер болгон. Ал балдарын биринчи класстан тарта акчаны башкарууга үйрөткөн. Карлос атасынын батасы менен биржа инвестициясын өздөштүрүп, 17 жашында биринчи миллионун тапкан.

Амансио Ортега 1975-жылы биринчи аялы менен бирге Zara'ны негиздешкен. Алар ишти алгач ич кийим жана халат тигүүдөн башташкан. 1980-жылдардын ортосунда дүкөндөр тармагы Испаниянын бардык аймагында иштей баштаган.

Amazon'дун негиздөөчүсү Жефф Безос кичинекей кезинен илимге жакын болгон. Ал үйүндөгү гаражды илимий долбоорлор үчүн лабораторияга айлантып салган. Amazon'ду ишке ашыруу дагы ошол гараждан башталган.

Уоррен Баффет 11 жашында эжеси менен бирге баасы 38,25 доллардан турган үч акция сатып алып, аны 40 доллардан саткан. Комиссия төлөмүнөн кийин 5 доллар пайда көргөн.

Марк Цукерберг чогуу жашаган Дастин Московиц, Эдуардо Саверин жана Кристофер Хьюз менен биргеликте Thefacebook.com социалдык түйүнүн иштеп чыгышкан. Бул жөнөкөй эле студенттик жатаканада ишке ашкан.

Билл Гейтс Сиэтл шаарындагы “Лейксайд” мектебинде окуган. Ал кичинекейинде олуттуу, аз сүйлөгөн, түнт болгон. Мектепте программалоону өздөштүрүп, 13 жашында “Tic-Tac-Toe” оюну үчүн биринчи компьютердик программасын түзүп чыккан.