Кытайда дүйнөдөгү эң узун көпүрөнүн курулуш иши аяктады

Кытай Эл Республикасында дүйнө жүзү боюнча эң узун делген көпүрөнүн курулуш иши аяктады. Белгилүү болгондой, мамлекеттик комиссия февраль айында көпүрөнү текшерүүгө уруксат берген.

Деңиз үстүндө курулган көпүрө Гонконг, Чжухай жана Макао аймактарын бириктирип, каттамдарды жеңилдетет. Ал эми көпүрөнүн жалпы узундугу 55 чакырымды түзөт.

Аталган көпүрөнү куруу иштерин 2009-жылы Кытайдын коммуникация жана курулуш компаниясы колго алган. Долбоорду ишке ашыруу үчүн 110 миллиард юань (16 миллиард доллар) акча каражаты сарпталган.

Деңиз үстүндөгү көпүрө жогорку технологиялык жабдуулар менен жасалгандыктан жердин 8 баллдык силкинүү күчүнө туруштук бере алат. Ал эми куруучулардын айтымында, көпүрө 120 жылга чейин кызмат кылат.

Унаалардын каттамы 2018-жылдын экинчи жарымында башталары пландалууда.