Ноокатта кыз-жигитти ур-токмокко алгандардын алтоо кармалды

"Ноокат районундагы Бостон айылында 50гө жакын адам кыз-жигитти ур-токмокко алган окуя боюнча 6 адам кармалды. Кармалгандар Ош облустук ички иштер башкармалыгына тергөөгө алып келинди", - деп 7-апрелде SUPER.KG порталына Ош ОИИБинин басма сөз кызматы билдирди.

Маалыматка караганда, жабырлануучу кыз жана сабалган адам милицияга интернетте видео тарагандан кийин арыз жазышкан.

"Ноокатта 18 жаштагы кызды унаага сүйрөтүү аракетин көргөн жана 23 жаштагы тургунду сабаган деген шек менен 6 адам кармалды. Аталган окуя боюнча соттук-медициналык экспертиза дайындалды. Адамды ур-токмокко алуунун жана кызды коркутуунун себеби учурда такталууда. Тергөө амалдары башталды", - дейт басма сөз кызматы.

Буга чейин окурман Ноокатта 50дөй адам кыз-жигитти ур-токмокко алганын, биринин абалы оор экенин кабарлаган. Андан кийин милициядан бул боюнча иликтөө иштери жүрүп жатканы маалымдалган. Көп өтпөй аталган айылга кыз менен жолугууга келген дагы бир жигит сабалып, жаракатынан улам каза болгону маалым болду.