Экономика министри: "Сатуудан алынуучу салык жогоруласа көмүскө экономикага чекит коюлат"

"Сатуудан алынуучу салык жогоруласа көмүскө экономикага чекит коюлат". Бул тууралуу экономика министри Олег Панкратов 6-августта өткөргөн маалымат жыйынында билдирди. Анын айтымында, сатуудан алынган салыкты көтөрүү демилгеси көптөгөн талкуулардан кийин кабыл алынган чечим болду.

Ошондой эле министр өз сөзүндө өкмөт бардык адамдарга жага турган чечим кабыл ала албасын айтып, бул демилге кабыл алынса анын жыйынтыгы негизсиз сын пикирлерге чекит коёрун белгиледи.

“Сатуудан алынган салыкты жогорулатуу чакан жана орто ишкерликке кедергисин тийгизбейт. Бул демилге накталай акча жүгүртүү менен иштеген ири ишкерлерге гана тийиштүү. Ал эми электрондук соода кылууда, карточка жана терминалдар менен төлөм жүргүзүүдө салык алынбайт. Демилгенин максаты - көмүскө экономиканы жоюу жана ишкерлерди накталай эмес төлөм жүргүзүү ыкмасына өтүүгө үндөйт. Барган сайын өлкөдө накталай эмес төлөм жүргүзүүнүн үлүшү өсүүдө. Мисалы, 2016-жылдан бери мурдагы жылдарга салыштырмалуу 10 пайызга көбөйгөн. Сатуудан алынуучу салыктын баасынын жогорулашы менен үч жылдын ичинде накталай эмес төлөм жүргүзүүнүн көлөмү 80-90 пайызга көбөйүшү мүмкүн. Мунун натыйжасы көмүскө экономикага кыскарып, өлкөнүн ички дүң продукциясынын көлөмү эки эсеге жогорулашы мүмкүн", - деди Панкратов.

Статистика комитетинин маалыматына ылайык, 2015-жылы накталай эмес төлөмдүн үлүшү 35,3 пайызды түзсө, ушул жылдын биринчи кварталында 44,2 пайызды түзгөн.