Чек ара кызматы: "Кыргыз-Тажик чек арасындагы ок атуудан чек арачы каза болду"

Кыргыз-Тажик чек арасында ок атылды. Бул тууралуу Мамлекеттик чек ара кызматынын басма сөз кызматынан билдиришти.

Маалыматка ылайык, ок атуудан чек арачы каза болду. "Куралды тажик тарап биринчи колдонду. Тажик тарап Максат айылындагы чек ара бекетин жана убактылуу коюлган Сай чек ара бекетин көздөй ок атышкан. Алдын ала маалымат боюнча, Кыргыз мамлекетинин чек арачысы каза болду. Ок атуу саат 21:30да токтотулду. Окуя тажик тараптын такталбаган аймакта курулуш иштерин баштаганынан улам чыккан. Буга чейин Кыргыз-Тажик Чек ара кызматынын өкүлдөрү курулуш иштерин токтотуу боюнча макулдашкан. Бирок Тажикстандын чек арачылары курулуш иштерин токтоткон эмес.

Учурда Кыргыз-Тажик чек ара кызматынын өкүлдөрү сүйлөшүү жүргүзүп жатышат", - деп жазылат маалыматта.

Буга чейин Кыргыз-Тажик чек арасында тажик тарап такталбаган жерге курулуш ишин баштаганы тууралуу маалымдалган.