Бишкекте Улуттук госпиталда 19 жаштагы келин каза болду. Ал 3 ай мурун эгиз төрөгөн

Бишкектеги Улуттук госпиталда 19 жаштагы келин каза болду. Маалыматты Биринчи Май РИИБинин маалымат катчысы кабарлады.

"17-февралда саат 18:00 чамасында нөөмөт бөлүмгө Улуттук госпиталда жаш эне каза болгондугу тууралуу маалымат келип түштү. Окуя болгон жерге ыкчам тергөө тобу барып, каза болгон келин 2001-жылы туулган Ж.Э. экенин аныкташты. Маркум мындан 3 ай мурун эгиз төрөгөнү маалым болду.

Бул факт Кылмыштардын жана жоруктардын бирдиктүү реестрине 152-берене (медициналык же фармацевттик кызматкер тарабынан кесиптик милдеттерди талаптагыдай эмес аткаруу) менен катталып, сотко чейинки өндүрүш иши ачылды. Тиешелүү экспертизалар дайындалды.

Учурда тергөө иштери жүргүзүлүп жатат", - дейт аталган мекеменин басма сөз катчысы.

Бул окуя боюнча Саламаттыкты сактоо министрлиги расмий билдирүү жасай элек.