"ЭЛДИК КАБАРга" ЖООП: "Автобус айдоочуларына март айынын айлыгы эртеңден баштап төлөнөт" деп мэриядан жооп беришти

"Элдик кабар" бөлүмүнө окурман Бишкек шаарындагы автобус айдоочулары март айындагы айлыктарын ала албай жаткандыгын айтып, видео жөнөткөн. Шаардык мэриянын басма сөз кызматынан бул окуя боюнча SUPER.KG порталына эртеңден баштап айдоочуларга март айынын акысы төлөнүп баштаарын билдиришти.

"Бишкек шаарына киргизилген өзгөчө абал режимине байланыштуу коомдук транспорт толук токтотулган. Андыктан "Тулпар" электрондук билеттештирүү долбоору да убактылуу иштебей калган. Натыйжада троллейбус башкармалыгы жана шаардык жүргүнчү ташыган автотранспорттук ишканасы шаардыктарды ташуудан түшкөн пландуу кирешени алышкан эмес (белгилей кетсек, аталган ишканалар өз алдынча чарбалык субъект катары саналып, жүргүнчү ташуудан киреше алышат).

Бирок учурда автобустун айдоочулары медицина кызматкерлерин, милиция кызматкерлерин жана муниципалдык ишканалардын кызматкерлерин ташып жатышат. Андыктан Бишкек шаарынын мэри Азиз Суракматовдун буйругу менен шаардык бюджеттен муниципалдык автобус жана троллейбустардын айдоочуларынын айлыгы үчүн 12 миллион сом бөлүндү. Айдоочуларга март айынын айлыгы 21-апрелден баштап берилип баштайт", - деп билдиришти басма сөз кызматынан.