Эртеңден баштап Ысык-Көл облусунан чыгууга тыюу салынат

4-майдан баштап Ысык-Көл облусунун тургундарына башка аймактарга барууга тыюу салынат. Бул тууралуу республикалык штабдан билдиришти.

"Мындай чечим бүгүн, 3-майда облустук ыкчам штабынын отурумунда кабыл алынды. Ыкчам штабдын маалыматында, аймак тургундары жүйөлүү себептер менен башка региондорго барууга, райондук мамлекеттик администрациялардын жана Каракол, Балыкчы шаардык мэриялар тарабынан берилген өткөрмө уруксат кагаздарынын негизинде чыга алышат.

Кайра облус аймагына кирген учурда, жарандар милдеттүү түрдө экспресс-тест же ПЦР анализ тапшыргандыгы жөнүндө маалымдамасынын негизинде кирет жана 14 күндүк үй карантинине алынат. Бул шарт Ысык-Көл облусунун аймагына кире турган адамдардын бардыгына тиешелүү. Облустук ыкчам штаб бул шарттарды түшүнүү менен кабыл алып, өзгөчө кырдаал режиминин шарттарын сактоого чакырат", - деп жазылат маалыматта.