Соль-Илецк шаарынан келгендердин 51и Талас облусуна кетишти. Алар Талды-Булак постунан обсервацияга алынды

Орусиянын Соль-Илецк шаарынан келгендер обсервациядан чыгарылып, анын ичинен 51 жаран 18-майда Талас облусуна кетишти. Облуска кайткан жарандар Талды-Булак постунан обсервацияга алынды. Мындай маалыматты республикалык штабдан кабарлашты.

Маалыматка ылайык, ар бир жарандан буга чейин 2 жолу ПЦР-анализ алынып, “таза” деген жыйынтык чыккан. Бирок коопсуздук үчүн 51 адам Кара-Буура жана Бакай-Ата райондорунда уюштурулган обсервацияларга жайгаштырылды. Алардан кошумча ПЦР-анализдер алынып, обсервацияга дагы 5 күн жаткырылат.

Ал эми социалдык түйүндөрдөгү “бийлик өкүлдөрү обсервацияга алынгандарды уруп-сабады” деген маалымат чындыкка дал келбейт. Тескерисинче, сырттан келген адамдар жергиликтүү бийлик өкүлдөрүнө баш ийбей, бир топ кыйынчылыктарды жараткан. Түшүндүрүү иштеринен кийин 51 жаран жергиликтүү бийликтин талаптарына макул болду.