Бишкекте алып-сатарлар 443 сомдук Гепариндин бир таңгагын 1800 сомдон сатып жатышат дейт окурман

Бишкектеги дарыканалардан Гепарин дарысын 443 сомго алып, аны кайра 1800 сомдон саткан адамдар бар. Мындай билдирүүсүн социалдык тармактын колдонуучусу жазып чыкты.

"Неман" өз кампасына дефицит болуп жаткан Гепарин дарысын алып келди. Таңды күтпөй эле сата башташты (азыр ар бир секунд баалуу учур). Баасы да элдин чөнтөгүнө ылайык, 443 сомдон сатышты.

Ал эми алып-сатарлар элдин кайгысынан акча иштешип бир таңгагын 1800 сомдон сатып жатышты. "Немандын" администрациясы алардан арзан алып кымбат саткан спекулянттарга жол бербеш үчүн, бир кишиге бирден гана таңгак сатыларын эскертишти. Дарыны арзан алып баасын 1800 сомго чейин көтөрүп, соцтармактарга "агама алдым эле, эжеме алдым эле, сатам" деп калп жарнама кылган алып-сатарлардын ойлору ишке ашпай калып, дарыканаларды караламайга өтүштү", - деп жазылат билдирүүдө.

Ал эми республикалык штабдан "Неман-Фарм" дарыканалар тармагы мамлекеттик органдардын жардамы менен COVID-19 вирусунун симптомдорун дарылоо үчүн "Гепарин" дармегинин партиясын алып келгенин маалымдашкан. "Өз кызыкчылыгы үчүн пайда көрүүнү каалаган алып-сатууларды алдын алуу үчүн дары 443 сомдон бир адамга бир эле таңгак менен сатылууда. Фармкомпаниянын айтуусунда, керектүү дары-дармектерге дефицитти болтурбоо үчүн бардык күчтөр жумшалууда. Эгерде дары-дармектердин баасын ашырып саткан учурлар болсо, Финансы полициясына 1955 номуру аркылуу билдирүүңүздү суранабыз", - деп жазылат маалыматта.