Кыргыз Республикасынын Эмгек сиңирген артисти Жыргал Көбөгөнова каза болду

Кыргыз маданияты чоң жоготууга учурады. Кыргыз Республикасынын Эмгек сиңирген артисти Жыргал Көбөгөнова каза болду. Бул тууралуу Кыргыз драма театрынан билдиришти.

Жыргал Көбөгөнова 1948-жылы 1-январда Ысык-Көл районунун Кара-Ой айылында туулган.

Ал эки залкар өнөр ээлери Абдыашым Көбөгөнов жана Сайрагүл Балкыбекованын кызы болгон.

Жыргал Көбөгөнова 1954-жылы Бишкек шаарынын №2 орто мектебинде билим ала баштаган. 4-класста окуп жүргөндө, пионерлер сарайында бий ийримине катышып жүрүп, 1958-жылы Москвада өткөн Кыргызстандын декадасында Сапарбек Кабеков менен Нурдин Тугеловдордун жетекчилиги астында «Пахта бийин» бийлеп чыккан. Ошондо ал болгону 10 жашта болгон. 8-класстан баштап 1963-жылы борбордо Цирктин студиясында машыгып жүрүп, 1964-жылы Кыргыз цирки ачылганда «Алгачкы карлыгачтардан» болуп аба гимнастынын ролун аткарып, цирктин чамгарагында чарк айланып бийлеген.

Жыргал Көбөгөнова 1971-жылы Нурдин Тугелов, Сапарбек Кабеков алгач уюшулган «Бий ансамблине» бийчи жана алып баруучу катары чакырышат. Бий ансамбли менен чет өлкөнүн булуң-бурчуна барып, күнөстүү Кыргыз өлкөсүнүн искусствосун көрсөтүп келген.

Ошол кездеги министр Күлүйпа Кондучалова Трускавец шаарында өткөн концертте Жыргал Көбөгөнованын үн-тембри апасы Сайракүл Балкыбекованын үнүнө өтө окшош экенин баамдап, атасы Абдыашым Көбөгөновго: «Драмалык жөндөмү күчтүү кызыңыздын багын байлабай, Оштогу жаңы ачылып жаткан драма театрына жибериңиз. Москвадан жаңы бүтүп келген теңтуштары менен иштесин», - дейт. 1972-жылдан баштап Ош облустук драма театрында актёрлук кесипти аркалап, ийгиликтүү ролдорду жаратат.

Ал Касымалы Жантөшевдин «Курманбегинде» - Гүлгаакы, Аалы Токомбаевдин «Күндүн чыгышында» - Госпожа ролдорун аткарып, алар эсте калаарлык образдар болуп калган.

Актрисага 1997-жылы Кыргыз театр искусствосуна сиңирген эмгеги үчүн «Кыргыз Республикасынын эмгек сиңирген артисти» деген жогорку наам берилген.

SUPER.KG порталынын эмгек жамааты Жыргал Көбөгөнова көз жумгандыгына байланыштуу жакындарына жана үй-бүлөсүнө көңүл айтып, аза кайгысын тең бөлүшөт.