Баткен облусундагы Төрт-Гүл суу сактагычынан Тажикстанга нормадан көп өлчөмдөгү суу берилип жатабы? Жооп

Баткен облусунун Баткен районундагы Төрт-Гүл суу сактагычында суу жылдагыдан аз, бирок аймакта сугат иштерине суу жетиштүү. Тынчсызданууга негиз жок. Бул тууралуу SUPER.KG порталына облустук администрациядан билдиришти.

Ага ылайык, Төрт-Гүл суу сактагычына жылына 90 миллион метр куб суу топтолот. Бүгүнкү күндө Төрт-Гүл суу сактагычындагы суунун көлөмү 28 миллион метр кубду түзүүдө. Өткөн жылга салыштырмалуу 6 миллион метр кубга аз. Суу сактагыч бүгүнкү күндө Баткен районунун 7 миң 498 жана Баткен шаарынын 1 миң 575 гектар жерин сугат иштерин суу менен камсыздап келет. Быйылкы жылы Төрт-Гүл суу сактагычынан Баткен районунун жана Баткен шаарынын айдоо жерлери үчүн суу берүү мезгили март айынан башталган же болбосо 6 миллион 300 миң метр куб суу жазгы сугат үчүн берилген.

Бүгүнкү күндө сууну сарамжалдуу пайдалануу жагы облустук өкүлчүлүк тарабынан түздөн-түз көзөмөлгө алынып, суу сактагычтагы суунун өлчөмү 28 миллион метр кубдун тегерегинде турукташты.

Ал эми Тажикстанга суу нормадан көп өлчөмдө берилип жатат деген сөз чындыкка дал келбейт. Ак-Суу дарыясындагы сууну бөлүштүрүү боюнча СССР учурунда түзүлгөн үч тараптуу келишимде Кыргыз өлкөсү, Тажикстан жана Өзбекстан мамлекеттери биргеликте пайдалануу жагы белгиленген.

Төрт-Гүл суу сактагычынан тажик тарапка алардын кайрылуусунун негизинде берилген суулар:
2018-жылы 7 миллион 948 миң метр куб;
2019-жылы 7 миллион 431 миң метр куб;
2020-жылы 7 миллион 730 миң метр куб суу берилген.

Учурда аталган суу сактагычтан келүүчү сууга болгон таңкыстык жок.