Бишкекте маркумдун туугандарынан сөөктү сойбоо үчүн акча талап кылган өлүккананын кызматкерлерине карата кылмыш иши козголду

Бишкек шаарындагы соттук-медициналык бюронун (өлүккананын) өкүлдөрү маркумдун туугандарынан сөөктү сойбоо үчүн акча талап кылуу фактысы боюнча териштирүү иштери башталды. Бул тууралуу SUPER.KG порталына өкмөткө караштуу экономикалык кылмыштуулукка каршы күрөшүү боюнча мамлекеттик кызматынан билдиришти.

"Бул иш Кылмыштардын жана жоруктардын бирдиктүү реестрине 238-берененин негизинде катталып, учурда сотко чейинки тергөө амалдары жүрүп жатат", - деп жазылган билдирүүдө.

Буга чейин социалдык тармактарда өлүккана кызматкерлери маркумду сойбоо үчүн 20 миң сом сурашканын, туугандары сүйлөшүп 10 миң сом бергендиги жарыяланып, кызуу талкууга алынган. Мындан тышкары жарандар маркумдун сөөгүн кезексиз алып кетиш үчүн өлүккананын кызматкерлери акча талап кылып жатышат деп даттанышкан.