Кыргыз өлкөсүнө Орусиядан келген дарыгерлер мекенине кайтышты

Орусиялык дарыгерлердин Кыргыз өлкөсүндөгү миссиясы ийгиликтүү жыйынтыкталды. Бул тууралуу республикалык штабдан кабарлашты.

Орусия Федерациясынын Башкортостан Республикасынан келген дарыгерлер кыргыз кесиптештеринин эмгегине жогорку баа беришти. Бул тууралуу саламаттыкты сактоо министри Сабиржан Абдикаримов билдирди.

"Саламаттыкты сактоо министрлиги иштеп чыккан дарылоо протоколдору, алгоритмдер жана башка расмий документтер туура кабыл алынып, туура ишке ашырылып жатканын орусиялык кесиптештер тастыкташты. Бир айга жакын убакыттын ичинде Кыргыз өлкөсүнүн бардык аймактарындагы медициналык мекемелерде иштеп, илдетти дарылоого активдүү катышты. Орусиялык дарыгерлердин Кыргыз мамлекетинде алып барган иш жыйынтыгында эки тараптуу, жигердүү тажрыйба алмашуу жүрдү десем жаңылышпайм", - деди Сабиржан Адикаримов.

"Кыргыз мамлекетинде колу жеңил, адискөй, кесибин сүйгөн дарыгерлер көп экен. Алар COVID-19 илдетине каршы күрөшүүдө мол тажрыйба топтошконуна жогорку баа бердик. Бийик тоолору жана таза суусу менен кооз Кыргыз өлкөсүн сагынабыз. Бизге жүктөлгөн милдеттерди толугу менен аткарганга жетиштик. Илдеттин очогунда коронавирус инфекциясына каршы кыргызстандык кесиптештерибиз менен бирге иштегенибизге сыймыктанабыз", - деди Башкортостан Республикасынын саламаттыкты сактоо министринин орун басары Евгений Кустов.