Өзбекстандык журналист Бобомурод Абдуллаевдин жактоочулары Кыргыз өлкөсүнүн Башкы прокуратурасына нааразы

Өзбекстандык журналист Бобомурод Абдуллаевдин жактоочулары Кыргыз өлкөсүнүн Башкы прокуратурасын туура эмес иш-аракет жасап жатат деп айыптоодо. Бул тууралуу SUPER.KG порталына Абдуллаевдин Кыргыз өлкөсүндөгү жактоочуларынын бири Тимур Карабаев билдирди.

Жактоочу өлкөнүн Башкы прокуратурасынын компетенциясында карала турган ишти алар райондук деңгээлдеги органдарга жөнөтүп коюшканын айтат.

"Биздин УКМКнын кызматкерлерине жана жетекчилигине, ошондой эле Башкы прокуратуранын өзүнүн кызматкерлерине карата берген арыз-даттануубузду Башкы прокуратура Бишкек гарнизонунун аскердик прокуратурасына кароо үчүн жөнөткөн экен. Башкы прокуратуранын мындай иш-аракеттерин туура эмес деп эсептейбиз. Себеби Бишкек гарнизону деген - бул райондук прокуратуранын эле аналогу. Ошондуктан Башкы прокуратуранын кызматкерлеринин иш-аркеттерине Бишкек гарнизонунун аскердик прокуратурасы эч качан баа бере албайт. Ошол эле көрүнүш УКМКнын борбордук аппаратынын кызматкерлерине дагы тиешелүү. Бул республиканын Аскердик прокуратурасынын же Башкы прокуратуранын деңгээлинде карала турган иш болчу", - дейт жактоочу Карабаев.

Азырынча бул боюнча УКМК жана Башкы прокуратура да расмий билдирүү жасай элек.

Буга чейин 2020-жылдын 9-августунда Бишкек шаарындагы кафелердин биринде кармалып, кийин УКМК тарабынан Өзбекстанга өткөрүп берилген журналист Бобомурод Абдуллаев Кыргыз өлкөсүнүн Улуттук коопсуздук комитетинин СИЗОсунда ага карата кыйноо болгондугу тууралуу ачык катын жарыялаганы маалымдалган. Каттын негизинде журналисттин жактоочулары Башкы прокуратурага арыз менен кайрылышканын билдиришкен.