Мас абалында эки спорт чеберин сүзүп өлтүргөн айдоочуга карата сот өкүм чыгарды

"Манас" аэропортуна бара жаткан жолдо велосипед тээп бара жаткан Илья Сидоров менен Евгений Требунскийди сүзүп кеткен айдоочуга карата сот өкүм чыгарды. Маалыматты SUPER.KG порталына Чүй облустук сотунан тастыкташты.

"Айдоочу күнөөнү моюнуна алды жана сот аны 8 жылга эркинен ажыратты. Мындан тышкары жабырлануучу тарапка 286 миң сом төлөп берүү милдеттендирилди", - деп билдиришти облустук соттон.

Окуя 30-июнда болгон. Анда 1981-жылы туулган жаран велосипед тээп бараткан эки жаранды сүзүп кеткен. Кырсыктын кесепетинен окуя болгон жерден 1 жаран каза болсо, экинчиси ооруканадан көз жумган. Кийинчерээк эки адам тең спорт чеберлери экендиги белгилүү болгон.

Дарыгерлердин корутундусуна ылайык, кырсык болгон учурда унаанын айдоочусу мас абалында болгон.