"Айрым партиялар эл менен жолугушууларда бет кап тагынуу жөнөкөй нормаларын сактабай жатат" дейт президент

Партиялар азыркы кырдаалда саясий гана маданиятка эмес, социалдык да маданиятка таасир этип жатышат. Бул тууралуу президент Сооронбай Жээнбеков "Биринчи радиого" маек берип жатып билдирди.

"Мына көрүп жатабыз, үгүт иштерин жүргүзүп жатышат. Айрым партияларда эл менен жолугушууларда бет кап тагынуу, социалдык аралыкты сактоо деген жөнөкөй нормалар сакталбай жатат. Майда деп буга маани бербей койгонго болбойт. "Эл башкарам, элдин тагдырын чечем" деген азаматтарыбыз бул маселеде да элге үлгү болушу керек деп эсептейм. Жалпысынан айтканда, алдыдагы шайлоо мыйзамдуу өтүп, парламенттик демократиянын калыптанышына салым кошот. Президент катары мурда да айткам, кайталап кетейин, шайлоолордун мыйзамдуу өтүшүнө бардык аракеттерди жасайбыз. Буюрса, шайлоо мыйзамдуу өтөт. Баарына тең бирдей шарт түзүлөт. Ар бир партияга, ар бир талапкерге, ар бир жаранга шартты бирдей түзөбүз", - дейт президент.