Өкмөт ата мекендик өнөр жай ишканаларын колдоо максатында аларга кураторлук кылат

Өкмөт башчы Кубатбек Боронов өнөр жай ишканаларынын ишмердүүлүгү жана инвестициялык долбоорлор боюнча кеңешме өткөрдү. Бул тууралуу өкмөттүн басма сөз кызматынан билдиришти.

Жыйында кризистен кийинки мезгилде ата мекендик ишканаларды, өнөр жай ишканаларын жана алардын инвестициялык долбоорлорун кураторлукка алуу механизми тууралуу талкууланганы маалымдалат.

"Бул механизм ишканалардын маселелерин ыкчам жана сапаттуу чечүүгө, ошондой эле аларга өзгөчө кырдаалдар жана өзгөчө абал режиминен кийин жагымдуу экономикалык жана уюштуруучулук шарттарды түзүүгө багытталды.

Ишканаларга кураторлук кылууда мамлекеттик органдардын жетекчилерине уюмдун финансылык жана башка ишмердүүлүгүнө кийлигишүүсү, таасири жана көзөмөл кылуусу жокко чыгарылары баса белгиленди.

Өкмөт башчы Кубатбек Боронов өндүрүш ишканаларынын өз убагында ишке киришүүсү жана келечектеги ийгиликтүү иш-аракеттерине колдоо көрсөтүүнүн маанилүүлүгүн баса белгиледи. "Өкмөттүн иши бизнести колдоого, өлкөбүздүн аймактарында жумуш орундарын көбөйтүүгө жана жумушсуздукту азайтууга көмөктөшкөн өндүрүш компанияларын өнүктүрүүгө, ошондой эле экономикалык активдүүлүктү калыбына келтирүүгө жана ишкердик субъектилеринин ишин колдоого багытталган", - деди өкмөт башчы", - деп айтылат маалыматта.