Президент Сооронбай Жээнбеков Венгриянын президентин Кыргыз өлкөсүнө чакырды

Президент Сооронбай Жээнбеков Венгриянын президенти Янош Адер менен жолугушту. Бул тууралуу президенттик аппараттын басма сөз кызматынан билдиришти.

Кыргыз-Венгер эки тараптуу кызматташтыгынын актуалдуу багыттары талкууланды.

Ошондой эле суу ресурстарын натыйжалуу пайдалануу жана экологияны коргоо боюнча пикир алышуу болду. Ал ошондой эле суу ресурстарын натыйжалуу башкаруу маселеси мөңгүлөрдүн эриши жана заманбап глобалдык чакырыктарды эске алуу менен актуалдуу болуп каларын баса белгиледи.

Буга байланыштуу Янош Адер келечекте дүйнө өлкөлөрүнүн күн тартибинде суу пайдалануу маселеси кыйла артыкчылыктуу болоруна көңүл бурду.

Президент Сооронбай Жээнбеков Венгрия президентин эки тараптуу кызматташтыктын стратегиялык өнөктөштүк деңгээлине чыкканы менен куттуктады.

Ал жогорку деңгээлдеги туруктуу сүйлөшүүлөр мындан ары көп тараптуу жана Кыргыз-Венгер кызматташтыгын активдүү өнүктүрүүгө мүмкүнчүлүк берерине ишенимин билдирди.

Венгриянын президенти кыргыз эли экологиялык маселелерге өзгөчө маани берерин, ата мекендик айыл чарба продукциялары экологиялык таза экендигин, мунун эсебинен продукция чет элдик рынокто ийгиликтүү атаандаш боло аларын белгиледи.

Президент Сооронбай Жээнбеков бул багытта өз ара кызматташууга даярдыгын билдирди жана Венгрия президенти Янош Адерди Кыргыз өлкөсүнө иш сапары менен келүүгө чакырды.

Тараптар эки өлкөнүн бакубаттыгы үчүн эки тараптуу кызматташтыкты өнүктүрүү үчүн активдүү байланыштарды улантуу зарылдыгын белгилешти.