ИИМ: "Биз эскертүү бергенбиз. Митингдин катышуучуларын атайын каражат колдонуу менен таратууга туура келди"

Ички иштер министрлиги аянтта болуп өткөн окуялар боюнча билдирүү таратты.

"Ички иштер министрлиги “Ала-Тоо” аянтындагы митингдин катышуучуларын тынч тарап кетүүгө чакырган. Бирок митингдин катышуучулары жана анын уюштуруучулары коомдук тартипти бузушуп, Чүй кең көчөсүндөгү кыймылды бууганга аракет кылышты. Андан ары агрессивдүү түрдө Чүй көчөсү аркылуу кыймылды баштап, Жогорку Кеңештин имаратын курчаган темир дарбазасын сындырууга аракет кылышты.

Таш ыргытышып, дарбазадан ашып кирүү аракеттерин жазашты. Ошол себептүү жарандардын коопсуздугун сактоо, шаардыктардын тынчтыгын бузбоо максатында митингге катышкандарды газ жана үн чыгаруучу атайын каражаттарды колдонуу жана суу бүрккөн автоунааларды пайдалануу менен таркатууга туура келди. ИИМ жарандардын ден соолугуна коркунуч жаралса же дагы башка жагымсыз окуялар болуп кетсе, ага жоопкерчилик митингдин уюштуруучуларында, тактап айтканда бир канча партия лидерлеринде жана алардын активдүү мүчөлөрүндө болорун эскерткенбиз. Бирок ошого карабастан алар коомдук тартипти бузууга барышты. Акцияны уюштуруучуларды жана партиянын лидерлерин митингге катышкандарды үйлөрүнө толук таратып кетүүгө дагы бир жолу чакырабыз. Учурда Бишкек шаарында коомдук тартип орнотуу максатында милиция кызматы күчөтүлгөн режимде кызмат өтөөдө", - деп жазылат маалыматта.