Башкы прокуратура: "Атамбаев жана Шадиевдин коррупция, мыйзамсыз баюу боюнча иштери сотко өткөрүлдү"

Мурдагы өлкө башчы Алмазбек Атамбаев менен экс-депутат Аскарбек Шадиевдин коррупция, мыйзамсыз баюу, кылмыштуу кирешелерди адалдоо боюнча иштери тергелип бүтүп, сотко өткөрүлдү. Бул тууралуу Башкы прокуратурадан маалымдашты.

Маалыматка ылайык, Башкы прокуратуранын ведомстволор аралык төргөө тобу менен УКМКнын иликтөө иштери аягына чыкты. Анда Жазык кодексинин 319 "коррупция" жана 215-беренелери "кылмыштуу кирешелерди адалдоо" менен айыпталып жаткан Алмазбек Атамбаев жана Аскарбек Шадиевге карата козголгон иштер каралды.

• Бишкек ТЭЦин модернизациялоодогу коррупциялык иштерде мамлекетке 5 миллиард 439 миллион 527 482 сом зыян келген;
• 225 миллон сом өлчөмүндөгү кылмыштуу кирешелерин адалдоо жана 323,7 миллион сомго кыймылдуу жана кыймылсыз мүлк сатып алуу жолу менен менен мыйзамсыз баюу;
• Жалал-Абад облусундагы "Терек" сурьма кенинин "Южный" участогун, №17 блогун мыйзамсыз ээлеп алуу. Ал жакта сурьманын (7231 тонна), алтындын (265 килограмм) жана күмүштүн (4246 килограмм) жалпы 8 миллиард 255 миллион 146 миң сомдук запасы бар.

А.Атамбаев жана А.Шадиев жана башкалар мамлекетке чоң суммадагы 13 миллиард 694 миллион 673 миң 937 сом зыян келтиргени айтылат маалыматта.