"Каражат үнөмдөө үчүн". Вице-премьер 3 аткаминерди Түркиядагы иш сапарга баруусуна уруксат берген жок

Түркияда Дүйнөлүк көчмөндөр оюндары боюнча делегаттардын жолугушуусу өтөт. Ал жакка Кыргыз өлкөсүнөн 5 өкүл барышы керек эле. Бирок мамлекеттик каражатты үнөмдөө максатында 2 өкүлдүн барышына гана уруксат берилип, үчөө барбай калды. Бул тууралуу вице-премьер-министр Эльвира Сурабалдиева Твиттер баракчасында жазып чыкты.

"Түркияда өтчү Дүйнөлүк көчмөндөр оюндарынын иш кеңешмесине 5 өкүл (экөө кабыл алуучулар тарабынан каржыланат, үчөө мамлекеттик бюджеттен каржыланат) барышы керек эле. Түркияга маданият министринин орун басары жана Жаштар иштери, дене тарбия жана спорт боюнча агенттигинин жетекчисинин орун басары барат.

Башка көйгөйлөр бул жакта деле жетиштүү. Бюджеттик каражатты үнөмдөө кичинекей нерселерден башталат", - деп жазып калтырган Эльвира Сурабалдиева.