"Отжимание жаса" деп баласын ур-тепкиге алган атага сот өкүмү чыкты

Москвада "Отжимание жаса" деп баласын ур-тепкиге алган атага сот өкүмү чыкты. Бул тууралуу орусиялык басылмалар жазып чыгышты.

Маалыматка ылайык, ал жалпы режимдеги колонияда 3,5 жыл жазасын өтөйт. "Ал кылмыш жасагандыгы үчүн күнөөлүү деп табылды. Москва шаарынын Кунцевский райондук сотунун өкүмү менен Ж.Э. жалпы режимдеги колонияда жазасын өтөйт. Ал 3,5 жылга эркинен ажыратылды", - деп жазылды маалыматта.

17-апрель күнү интернет талаасына баласына зомбулук көрсөтүп, "отжимание жаса" деп ур-тепкиге алган атанын видеосу тараган. Кийинчерээк баласына кордук көрсөткөн Кыргыз жаранынын аты-жөнү аныкталып, изделип жаткандыгы кабарланган. Баланын апасы алардын башка багар-көрөрү жоктугун айтып ыйлап, коомчулуктан кечирим сурап кайрылган видеосу да тараган.