Кышында ным болуп калган бет капты тагынуунун пайдасы жана зыяны тууралуу пульмонолог айтып берди

Кычыраган кыш мезгили дагы келип, абанын температурасы кыйла төмөн болууда. Ал эми дүйнө жүзүн каптап, жашоо образын өзгөртүүгө жетишкен коронавирустан сактануу үчүн бет кап тагынып жүрүү зарыл. Ден соолук үчүн адамдар бардык шартка көнөрү бышык. Айталы дегенибиз, адамдар жайдын ысык аптабына, күндүн сууктугуна карабай бет кап тагынып жүрүшөт.

Күндүн суугунда бет каптын ичи ным болуп калууда, бул учурда бет кап вирустан коргой албай калабы, кайсы жерде бет кап тагынуу зарыл жана башка суроолорго жооп алуу үчүн Улуттук госпиталдын пульмонология бөлүмүнүн башчысы Акылай Маасаидовага кайрылдык.

- Саламатсызбы? Аба ырайы суук болгондо бет кап ным болуп калууда, бул учурда бет кап вирустан коргобой калабы?

- Саламатчылык. Бет кап ным болуп калганда вирустан коргобойт дегендин кайсы бир деңгээлде туура жактары бар. Анткени нымдуу чөйрөдө вирус көбүрөөк убакытка сакталат. Ошондуктан бет капты тез-тезден алмаштырып туруш керек.

- Эгер адамдар ным болгон бет капты көпкө чечпей тагынып жүрө берсе кандай ооруларга туш болушу мүмкүн?

- Ным болгон бет капты көпкө чечпей жүрө берсе эч кандай деле ооруларга туш болбойт.

- Азыр суук болгондуктан маршруткага кирер менен бет кап бууланып, ным болуп калууда. Мындай учурда эмне кылуу керек?

- Бет кап нымдуулук болуп калган убакытта аны бат-баттан алмаштыруу керек. Жазгы убакта бир ирет колдонулуучу бет капты 2 саатта алмаштыруу керек болсо, кыш мезгилинде 1 саатта алмаштырып туруу зарыл. Албетте, бул бет каптын ичи бууланып, нымдуулук толуп кеткендигине байланыштуу. Мүмкүн болсо 40 мүнөттө алмаштырып турса максатка ылайык болмок. Көчөдө, эл аз жүргөндө бет капты чечип, ал эми көпчүлүк адамдар бар жерлерде сөзсүз тагынуу абзел.