Сооронбай Жээнбеков умрага кетти. Күн ичинде орун алган саясий окуялардын топтому бир шилтемеде

Бүгүн, 2-февраль, күнгө шейшемби. Саясий окуялардан кабардар болууга үлгүрбөй калсаңыз, бул материал сиз үчүн. SUPER.KG порталы күн ичинде орун алган "туздуу" саясий окуялардын топтомун сунуш кылат.

Сооронбай Жээнбеков умрага кетти

Кыргыз өлкөсүнүн экс-президенти Сооронбай Жээнбеков үй-бүлөөсү менен Кыргыз өлкөсүнөн чыгып кетти. Бул тууралуу маалымат булактары өзүнүн ишенимдүү булактарына таянып жазды.

Маалыматка ылайык, Жээнбеков "Манас" аэропортунан Түркиянын Стамбул шаарына учуп кеткен.

Ал эми экс-президенттин басма сөз катчысы Толгонай Стамалиева Жээнбеков умра сапарына кеткенин айтты.

"Сооронбай Жээнбеков Мекке шаарына кичи ажылыкка учуп кетти. Ал эртең менен жубайы менен Стамбулга учту, андан ары Сауд Арабиянын Жидда шаарына учушат.

Белгилей кетсек, Сооронбай Жээнбеков бул сапарга Сауд Арабиясынын падышасынын чакыруусу менен кетти. Сапар 2020-жылдын ноябрь айында пландаштырылган. Пандемияга байланыштуу зыяратчылардын санына чектөөлөр болгон жана милдеттүү түрдө чакыруу себеби менен эми кетти.

Чакыруу 2021-жылдын февраль айында келди. Кичи ажылык сапары 10 күндөн ашык убакытка созулат. Андан кийин Жээнбеков Бишкекке кайтып келет", - деди Стамалиева.

Эскерте кетсек, буга чейин октябрь айындагы окуяларда жаракат алгандар митингге чыгып, Башкы прокуратурага Жээнбековду митингчилерди күч менен таркатуу боюнча укук коргоо органдарына буйрук бергендиги үчүн жана экс-президент макамынан ажыратуу боюнча чара көрүү өтүнүчү менен арыз жазышкан.

Жогорку Кеңештин комитет жыйынында сунушталган өкмөттүн курамы каралды

Бүгүн Жогорку Кеңештин комитет жыйынында сунушталган өкмөттүн курамы каралды. Анда көпчүлүк коалиция тарабынан премьер-министрлик орунга сунушталган Улукбек Марипов жаңы өкмөттүн курамын сунуштады. Ага ылайык, өкмөт мүчөлөрүнүн санын 22ден 16га кыскартуу каралууда.

Премьер-министр — Улукбек Марипов;
Биринчи вице-премьер — Артём Новиков;
Экономика жана финансы министри, вице-премьер — Улукбек Карымшаков;
Өкмөттүн аппарат жетекчиси — Жеңиш Асанкулов;
Тышкы иштер министри — Руслан Казакбаев;
Коргоо министри — Таалайбек Өмүралиев;
Айыл, суу чарба жана региондорду өнүктүрүү министри — Аскар Жаныбеков;
Энергетика жана өнөр жай министри — Кубанычбек Турдубаев;
Ички иштер министри — Улан Ниязбеков;
Транспорт, архитектура жана коммуникациялар министри — Гүлмира Абдралиева;
Өзгөчө кырдаалдар министри — Бообек Ажикеев;
Юстиция министри — Асел Чынбаева;
Маданият министри — Кайрат Иманалиев;
Билим берүү жана илим министри — Алмазбек Бейшеналиев;
Саламаттыкты сактоо министри — Алымкадыр Бейшеналиев;
Улуттук коопсуздук мамлекеттик комитетинин төрагасы — Камчыбек Ташиев.

Жыйынтыгында Жогорку Кеңештин комитети өкмөттүн жаңы курамын жактырып, парламенттин жалпы жыйынынын кароосуна жөнөттү.

Президент "өлкө үчүн 12 министр да көп" дейт

Ал эми өлкө башчы Садыр Жапаров өкмөттүн жаңы курамы боюнча социалдык тармактагы баракчасы аркылуу билдирүү жарыялады. Президенттин айтымында, мурун кимге кызмат жетпей калса эле министрлик ачып бере беришкен.

“Урматтуу кыргызстандыктар! Биз өлкөбүз оңолсун, мамлекеттик башкаруу иретке салынсын, казынадан уурдагандар токтосун, ашыкча кызматтар жоюлсун деп революция кылганбыз. "Мен революция жасагам, ошол үчүн ушул кызматта өмүр бою отурушум керек, жоюлбасын" деген түшүнүктөн алыс бололу. Бул бир. Экинчиси, кадр саясаты боюнча, “бул Акаевчи болчу, бул Бакиевчи болчу, бул Атамбаевчи же Жээнбековчу болчу” деген эски түшүнүктөрдү токтотолу. Минтип отурсак, анда өлкөбүздүн ичинен бир дагы татыктуу кадр таппайбыз, аны башка планетадан издешибиз керек болот.
Үчүнчүсү, баланча министрликке, Садыр Жапаровго душман болуп жүргөн, аны камаганга салым кошкон кадр бара жатат деп сындагандарга айтарым, азыр биз душмандаша же туугандаша турган мезгил эмес. Эл үчүн, мамлекеттин келечеги үчүн өткөн-кеткенди унуталы, сабырдуу бололу. Кудай сабырдуулар тарапта.

Ар бир министрликке мурдагыдай тааныш-билишти эмес, ошол министрликтин адисин алып бара жатабыз. Мындан ары “бөдөнөнү сойсо да касапчы соёт”. Эгерде мурдагыдай көндүм адатын жасап, уурдай баштагандар болсо, дароо камалышат.
Төртүнчү, бүгүнкү күндө жалпысынан 48 министрликтер, комитеттер, агенттиктер жана башка ведомстволор бар экен. Кимге кызмат жетпей калса эле министрлик ачып бере беришкен. Элге кылган кызматы же пайдасы жок, казынадан миллиарддарды жеп отурушат. Таблицадан көрүп турганыңардай, ошонун баарын кыскартып, 12 эле министрлик калтырдык. Бир эле энергетика системасынан 2 миллиард сом үнөмдөлүп жатат. Кичинекей Кыргыз өлкөсү үчүн керек болсо 12 министрлик да көптүк кылат. Бирок азырынча ушундай кылдык.
Ар бир чечимди “жети өлчөп, бир кесип жатабыз”.
Бир революционердин кызыкчылыгын көздөп, алты жарым миллион элдин кызыкчылыгын тебелебейли”, – деп айтылат Садыр Жапаровдун билдирүүсүндө.

Жаңы өкмөттүн курамына кирбей калган айрым аткаминерлер үн катты

Социалдык тармактарда жаңы өкмөттүн курамына Эльвира Сурабалдиева, Тилек Токтогазиев жанан Нуржигит Кадырбековдун кирбей калганы кызуу талкуу жаратууда. Бул боюнча Нуржигит Кадырбеков азырынча үн ката элек болсо, Тилек Токтогазиев эртең атайын маалымат жыйын өткөрүп, пикирин айтууну убада кылды.

"Урматтуу кыргызстандыктар! Колдооңуздарга чоң рахмат. Сиздердин ар бир айтылган жылуу сөзүңөр, колдоо максатында жазган каттарыңар жана чалууларыңар демиме дем кошту. Бул мен үчүн абдан жагымдуу.

Министр катары жумушка киришкен күнү мен сиздерге отчёт берем деп убада бергем. Андыктан, эртең 100 күндүн ичинде биздин команда кандай ири долбоорлорду ишке ашырганын айтып берүү үчүн маалымат жыйын беребиз. Баса, азыр мен жөнүндө, министрлик жөнүндө ар кандай ушактар айтылып жатат. Сиздерди ишенимдүү булактардын такталган маалыматтарын гана окууга чакырам", - деп жазды ал.

Премьер-министрлик кызматка сунушталып жаткан Улукбек Марипов Тилек Токтогазиевдин өкмөттүн курамына кирбей калышы боюнча пикирин SUPER.KG порталына төмөндөгүчө билдирди:

"Тилек Токтогазиев дасыккан кадр. Аны эске алабыз. Ал боюнча оюм жаман эмес, анын тажрыйбасын сөзсүз колдонобуз. Өзү менен кеңешейин, ал менен жолуга элекмин", - деди ал.

Ал эми Эльвира Сурабалдиева кызматынан кетип жатканына нааразы эмес экендигин билдирди. Мындай пикирин ал Твиттер баракчасында жазып калтырды.

"Колдоо көрсөткөн жана жардам бергендердин баарына, ошондой эле жумушумду сындап, ал үчүн тынсыздангандарга ыраазычылык билдирем! Жогорку кызмат - чоң жоопкерчиликти талап кылат. Муну менен бирге чоң стрессти алып жүрөт. Оор мезгилде келдим. Убактылуу экендигин билгем. Алдын ала сүйлөшүлгөн. Буга нааразы эмесмин.

Кечээ күнкү документ иштерин бүтүрүп, тынч жан дүйнөм менен жумуштан кетем.

Коронавирус боюнча жоопкерчиликти алуу оңой эмес. Республикалык коронавирус менен күрөшүү штабын Саламаттыкты сактоо министрлигине өткөрүп берем. 2021-жылдын 4-февралында вице-премьер-министр болгонума 100 күн болот. Отчётумду берем", - деп жазып калтырган Эльвира Сурабалдиева.