"ЭЛДИК КАБАРга" жооп: Жалал-Абаддагы базар чыры. "Соода жайын көчүрүү шаар тургундарынын талабы" дейт мэрия

Жаңы курулуп жаткан базар, иш процесси жүрүп жаткан учурдан кадр

SUPER.KG порталынын "Элдик кабар" бөлүмүнө Жалал-Абад шаарынын тургуну кайрылып, шаарда жайгашкан борбордук базарды мэрия башка жакка көчүрүп жатканын жана буга соодагерлер нааразы экенин айтып берген.

Ошондой эле алар шаар мэри Эрнисбек Ормоковдун кызматтан кетүүсүн талап кылып, нааразычылык акциясын да уюштурушканын маалымдашкан.

Мындан улам SUPER.KG порталы Жалал-Абад шаардык мэриясы менен байланышып, окуянын чын-бышыгын сурады.

Жаңы базарга көчүрүүнү бул жерде соодагерлер туура эмес түшүнүп жатышат деген мекеменин маалымат катчысы Азамат Жээнбеков окуя тууралуу төмөнкүдөй маалымат берди.

"Базардын көчүрүлүүсү боюнча эч бир тараптын кызыкчылыгы жок. Азыркы борбордук базар шаардын так ортосунда жайгашкан. Бул бүгүн пайда болгон маселе эмес. Буга чейин иштеп кеткен жетекчилер да ушул базарды көчүрүү боюнча демилге көтөрүп келишкен. Анын үстүнө шаар тургундарынын да базарды көчүрүү боюнча сунуштары бар. Алардын суранганынын себеби базар шаардын борборунда жайгашып, ал жерде жол тыгындары көп болот жана эч кандай унаа токтотуучу жай жок. Чынында бул кырдаал шаардыктарга өтө ыңгайсыздык жаратчу. Анын үстүнө базар үч жолу күйүп кеткен. Мындан улам базардын техникалык коопсуздук базасы да чың эмес деп айтууга болот. Айтылган көйгөйлөрдү эске алуу менен жаңы базар куруу азыркы замандын талабы. Мына ушулар негиз болуп, азыркы тапта башка жакта базар курулуп жатат. Ал жак бардык талаптарга жооп берет, унаа токтотуучу жай да бар.

Азыр базарда имарат курган адистер иштеп жатат. Мэриянын максаты шаардагы жол тыгынын болтурбоо жана соодагерлерге ыңгайлуу жай түзүп берүү. Борбордук базардын көп жерлери жеке тараптарга өтүп кеткен. Ал маселе да чечилип жатат. Негизи бул жерде соодагерлер туура эмес түшүнүп жатышат. Бүгүн соодагерлерди мэр кабыл алды. Алар азыр борбордук базарда иштей беришет, соодагерлерди мэрия бүгүн же эртең орундуктарынан кууп жиберип жаткан жок. Биз түшүнүү менен эле мамиле жасап жатабыз. Анткени аларды көчүрөт турган базар азыр бүтө элек. Соодагерлер жаңы базарга көчүп баргандан кийин да 6 айга чейин эч кандай жер салыгын төлөшпөйт", - деди маалымат катчы.

Ошондой эле мэрия муниципалдык базардын артыкчылыктары тууралуу төмөнкүдөй маалымат берди.

Жаңы базар Курманбек көчөсүндө жайгашып, аянты 3 гектардан ашат.

Базар ишке кирсе эң ириде калаа бюджетине 180 миллион сомго чейинки акча каражаты түшөт. Бул сумма шаардын жылдык бюджетинин үчтөн бир бөлүгүнөн да көп. Демек, муниципалдык базарды ачуу менен калаа казынасын толтуруп, ал акчалар кайра эле шаар кызыкчылыгына жумшалат.

Ал эми жаңы базардагы шарттар да заман талабына ылайыкташтырылат. Азыркы борбордук базардын көрүнүшүндөй жагдай түзүлбөйт. Эң башкысы базар жабык имараттын алдында болуп, кыш-жай мезгилдеринде соодагерлерди азапка салбайт. Жаан-чачында суу өтүп, эл басуучу жолдор көлчүккө айланган абал болбойт. Учурдагыдай алачык сыяктуу шаар көркүн бузган соода жайлары орун албайт.

Базарда ар бир буюм же нерсе катар-катарга бөлүнүп сатылып, башаламандык жаралбайт. Кардар каалаган буюмун сатып алууда азыркыдай тартипсиздикке туш болбойт (Азыр азык-түлүк менен кийим, идиш жуучу каражаттар менен жер-жемиш аралаш сатылып жатканын билесиздер).

Өрт коопсуздугуна тыкыр көңүл бурулат. Адамдар басуучу жолго чейин соода жай кылып алгандарга уруксат берилбейт.

Жаңы базарда соода бир калыпка түшүп, кардарлар да көнгөнгө чейин жарым жыл убакытка чукул эч кандай аренда акы өңдүү төлөмдөр алынбайт. Келечеги бар жана эл каалаган базарда соода баштагандар үчүн жеңилдиктер берилет.

Кардарларга ыңгайлуу шарттарды түзүү сөзсүз түрдө эске алынат. Маршруттук каттамдардын багыты өзгөрүп, ар тараптан келген элдин базарга келип кетүүсүнө ылайыкташтырылат. Жеке унаалары менен келгендерге базардын алдына унаа коюучу жай бөлүнөт.

Жогорудагы шарттарды түзүп, муниципалдык базар ачуу менен жергиликтүү бийлик да, шаардыктар да зыянга учурабайт. Борбордук базар көчкөндө шаар борбору да башаламандыктан арыла алат.

Бул тууралуу базардагы соодагерлер менен мэр Эрнисбек Ормоков жолугушууда айтып берди. Арасында азыркы базардан көчүүнү каалабаган айрым жарандар каршылыгын билдиришүүдө. Алардын жаңы муниципалдык базарга баруу же баш тартуусу жеке тандоосу экенин айткыбыз келет. Бирок шаар бийлиги мунун алкагында иш жүргүзүүнү күчөтүп, муниципалдык базар ачуу иштерин тездетет. Учурда болжолдонуп жаткан имаратта тийиштүү иш кетүүдө.