Ошко заманбап аэропортту Түркия курабы?

Ош облусунда жаңы эл аралык аэропорт куруу- стратегиялык жана экономикалык чоң мааниге ээ. Ал үчүн 10 гектар жер аянты Мады айыл аймагынан бөлүнгөн, бирок каражат чечилбей токтоп калган. Буга чейин кытайлык жеке компания куруу ниетин билдирген, бирок стратегиялык мааниден улам колдоо тапкан эмес. Бул тууралуу өкмөттүн Ош облусундагы ыйгарым укуктуу өкүлүнүн маалымат кызматынан кабарлады.

"Эми Түркия мамлекети тарабынан каржылоо сунушу түшкөн. Бул багытта талкуу иштери жүрүп жатат. Аэропорт куруу пландалган аянтты Ош облусунун башчысы Жарасул Абдураимов, өкүлдүн орун басары А.Махаммадов, Кара-Суу районунун акиминин милдетин аткаруучу К.Адиев, Мады айыл өкмөтүнүн башчысы Ж.Матанбаев жана башка тийиштүү кызматтын жетекчилери барып жеринен көрүп, өкмөткө сунуш даярдоо тапшырмасы коюлду", - дешти мекемеден.