"Бир саат тамак ичет, бир саат тамеки чегет". Президент жаңы Ак Үйдү куруп жаткандарды сындады

Өлкө башчы Садыр Жапаров бүгүн, 17-июлда Бишкектин түштүк-батыш тарабында мурдагы "Ысык-Көл мейманканасынын ордуна салынып жаткан жаңы Ак Үйдүн курулушу жай жүрүп жатканына нааразы болду. Мамлекет башчысы бул тууралуу Транспорт жана коммуникациялар министрлигине жол курууга керектелген 265 даана атайын техниканы тапшыруу аземинде айтты.

"Октябрда саммит өтөт, сентябрга чейин бүтөбүз деген планыбыз бар эле. 400дөн ашуун кыргыз жигиттери иштеп жаткан. Аман эле бололу, бир күндө 8 саат иштеш керек болсо анын 5 эле саатын иштейт. Ишемби күнү да иштеш керек болсо, ал күнү жок, айрымдары дүйшөмбү күнү да келбей коёт. 5 саат иштегени эртең менен иштеп баштайт дагы 1 саат түштөнөт, бир саат телефон чукулайт, бир саат тамеки чегет. Чет өлкөлүк бир күндө жасаган ишти, кыргыздар бир жумада да бүтүрө албай жатабыз", - деди Жапаров.

Ошондой эле ал Асман шаарын курууга Дубайдан учуп келген 800дөй курулушчуну сентябрга чейин жаңы өкмөт үйүн бүтүрсүн деп Бишкекте алып калышканын кошумчалады.

Белгилей кетсек, министрликтин түзүмдөрүнө республикалык бюджеттин эсебинен сатып алынган 265 даана атайын техника берилди. Аларга заманбап самосвалдар, автогрейдерлер, битум ташыган транспорт каражаттары, бульдозерлер, авто бетон аралаштыргычтар, экскаваторлор жана башка техникалар кирет.