АКШнын чалгын кызматы Али Хаменеини табууда жана өлтүрүүдө маанилүү ролду ойногон

Француз порталы Intelligence Online АКШнын Борбордук чалгындоо башкармалыгы Ирандын маркум жогорку лидери Али Хаменеини табууда маанилүү ролду ойногонун жазып чыкты.

Порталдын маалыматы боюнча, АКШ менен Израилдин биргелешкен операциясын баштаган америкалык чалгындоо болгон. Операция учурунда Ирандын жогорку лидери жана анын бир нече жакын шериктери күндүз өлтүрүлгөн.

Портал белгилегендей, борбордук чалгын башкармалыгынын директору Жон Рэтклифф өткөн дем алыш күндөрү АКШнын президенти Дональд Трамп менен анын Мар-а-Лаго резиденциясында болгон. Кийинчерээк The New York Times гезити АКШ агенттигинин Иран лидерин издөөдөгү алдыңкы ролун баса белгилеген макала жарыялаган.

Басылма чалгын кызматынын маанилүү ролу тууралуу маалыматтын чыгып кетиши Израилди кыжырдантышы мүмкүн экенин белгилейт. Анткени Ирандын жетекчилигин издөө көптөн бери артыкчылыктуу маселе болуп келген.

Буга чейин Израилдин чалгын кызматы бир нече ай бою Хаменеини тыкыр көзөмөлгө алып жүргөнү айтылган.