Өзбекстандын курама командасы Нью-Йоркто күчөтүлгөн текшерүүдөн өттү (видео)

Өзбекстандын футбол боюнча улуттук курама командасы Нью-Йорк шаарына жолдоштук беттешке баргандан кийин АКШнын коопсуздук кызматтары тарабынан күчөтүлгөн текшерүүдөн өткөрүлгөнү кабарланды.

Футболчулар жана делегациянын мүчөлөрү кызматтык иттердин жана коопсуздук кызматкерлеринин катышуусунда жеке текшерүүдөн өтүшкөн. Алар нидерланддыктар менен беттешүүгө барган.

Оюнчулар автобустан бирден түшүрүлүп, ар бири өзүнчө текшерилди. Ошол эле учурда алардын жеке буюмдары каралып, металл издөөчү аппараттар аркылуу кошумча текшерүү жүргүзүлдү.

Маалыматка ылайык, мындай катуу коопсуздук чараларынын себеби катары аймакта АКШнын президенти Дональд Трамп жүргөнү айтылууда. Ал баскетбол оюнун көрүүгө барган. Бирок бул маалымат расмий түрдө тастыкталган эмес.

Өзбекстандын курама командасы үчүн быйылкы оюн тарыхындагы алгачкы Дүйнө чемпиондугу болуп саналат. Тайпалык этапта команда Колумбия, Португалия жана Конго Демократиялык Республикасы менен ойнойт.

Дүйнө чемпиондугу 11-июндан 19-июлга чейин АКШ, Канада жана Мексика өлкөлөрүндө өтөт.