Ош. "Ош мунарасы" аттуу көп кабаттуу үйдүн чатырында Түркиянын байрагы илинип турганына окурмандар кызыгышты 

Ош шаарындагы Монуев менен Аскар Шакиров көчөсүнүн кесилишинде курулуп жаткан "Ош мунарасы" аттуу көп кабаттуу үйдүн чатырында Кыргызстандын желегинин ордуна түрк элинин байрагы желбиреп турганын шаар тургуну Куштарбек Хасанов көрүп, тиешелүү жетекчилерден жооп алып берүү өтүнүчү менен бүгүн, 23-майда SUPER.KG порталына кайрылды.

"Ошол жерден саат сайын аткаминерлер тууну көрүшөт. Анан көзүн май баскансып, ары-бери байкамаксан болуп өтүп жатышканын кантип түшүнүүгө болот?" дейт ал кайрылуусунда. 

Бул тууралуу Ош шаардык курулуш тармагын жетектеген вице-мэр Жапар Ормоновго байланышканыбызда "андай болушу мүмкүн эмес, негизинен мен бул "Ош мунарасын" карабайм" деди. Ал эми Ош шаардык муниципалдык менчик башкармалыгынын башчысы Алимбай Кадыров: "Ал көп кабаттуу үйдү түрк компаниясы куруп жатат. Алар тарабынан бизге көп жардам берилген. Ошондуктан алардын желегинин желбиреши мыйзамдуу эле көрүнүш",- деди.