Жетсе башың булутка,
Алды-артыңды унутпа.
Жаман, жакшы күндөрүң,
Келет, кетет турмушта.

Өмүр чуркап алыска,
Өлүм менен жарышта.
Канжыгага баш байлап,
Жигит өтөт намыска.

Адам көпкө багынат,
Алдоолорго чалынат.
Таалайына жетсем деп,
Тагдырына жалынат.

Адам барга ичи ток,
Жокко айласыз күчү жок.
Ысык жандын бир күнү
Муздарында иши жок.

Адам кызык туулган,
Ааламга үнү угулган
Болор иши кайчы өтүп,
Болбос ишке муунган.

Адамга өмүр ченетпейт,
Ар кимде үмүт элестейт.
Карылыкты жээрийт да,
Көп жашагым келет дейт.

Адам кайда жүрбөгөн,
Акылы артык дүйнөдөн.
Ошентсе да кызыгы
Өлөр күнүн билбеген.

Адам кызык баарынан,
От чыгарып табынан...
Келечегин тапсам дейт,
Өткөн күндүн маалынан.

Жайдын бир толук кезинде,
Адырлуу тоонун бетинде.
Сан гүлдөн тандап бирди үзгөн,
Жайдары селки эсимде.

Өзүмдү сага берем деп,
Өмүрдүн гүлүн терем деп.
Сүйлөшкөн күндөр эсимде,
Турмуштун сыры тереңдеп.

Агарып тоодон таң аткан,
Суюлуп жылдыз бараткан.
Антташкан күндөр эсимде,
Кыйышпай күлө карашкан.

Сен менин жазылбаган ырларымсың,
Сен менин айтылбаган сырларымсың.
Туйлатып жүрөгүмдү алоолонткон,
Сен менин жаштык жалын жыргалымсың.

Сен менин көк деңизим чалкып жаткан,
Үстүндө ак куу ойноп, чардак учкан.
Эң назик эрке сезим кылдарындай,
Сен менин жыргалымсың нурун чачкан.

Сен менин ак кептерим канат каккан,
Сен менин мөл булагым калкып жаткан.
Ыраазымын миң мертебе тагдырыма,
Өмүрдө издеп жүрүп сени тапкан.