Алма сунсам колуӊа,
Колума, колума,
Албай аны койдуӊ да,
Койдум да, койдум да,
Жоолук салсам мойнуӊа,
Мойнума, мойнума.
Салбай аны койдуӊ да.
Койдум да, койдум да.

Кайырма:
Мунун баары тамаша,
Ия, яя, кандайча?
Бир басалы жанаша,
Жанаша, жанаша.
Алышып ойноп жүрөлү,
Жүрөлү, жүрөлү
Алты жашар балача,
Балача, балача.

Билемин сенин оюӊду,
Кармасам дейм колуӊду.
Колумду, колумду,
Күтөм, күтөм зарыгып,
Карай берем жолуӊду.

Кайырма:
Мунун баары тамаша,
Ия, яя, кандайча?
Бир басалы жанаша,
Жанаша, жанаша.
Алышып ойноп жүрөлү,
Жүрөлү, жүрөлү,
Алты жашар балача,
Балача, балача.

Көп жашаган карт дарактын жанында,
Картайганча бир болобуз дегенбиз.
Мен бактылуу сен бар үчүн жанымда,
Жазгы таңда чаңга аралаш келгенбиз.

Бурул тартып чач арасы суюлуп,
Улгаюунун алды жаңы туюлуп.
Сага деген оттой сезим өчпөптүр,
Жаштык кезден кетсек дагы бурулуп.

Сүйүү бизге мезгилинен кеч келип,
Сен экөөбүз бир бакытка тең шерик.
Кыя алганмын кымбат ошол кездердин,
Жүрөлүчү дайым бирге эскерип.

Мындай таалай тилебегем Теңирден,
Мындай күндү күтпөгөнмүн же бир мен.
Эсим эки болуп турат, эркетай, эркетай,
Эриниңдин даамы кетпей эринден.

Арга жоктур буйругуна Кудайдын,
Аттиң, эрте көрбөгөнүм - бул айыбым.
Жакшы жатып, жакшы түш көр десем да,
Кош дегенге кантип гана чыдаймын?

Кыналышып бир жүрөккө бир жүрөк.
Үнсүз, сөзсүз көшүлөсүң үргүлөп.
Арта калсаң ак жумуру билегиң,
Ак алкымың үлбүрөктөн үлбүрөк.

Жан жыргатып жалбыз жыттуу илебиң,
Жабышты бек моюнума билегиң.
Мындан ары махабатты ырдаймын,
Махабаттын бар экенин билемин.

Жан дүйнөмө жагып турду жамалың,
Жалын чачып неге мени карадың.
Жандап баспай жалгыз кеттим садага
Жаш экенсиң жаштыгыңды аядым

Имирилип неге мынча карадың,
Ийик сымал ийрип жибин санаанын
Ишенимиң сынбасын деп садага
Ийнеликтей назиктигиң аядым.

Кирпигиңди кайра-кайра кададың,
Кайдан билдиң мен эмнени самадым
Катар баспай жалгыз кеттим садага,
Каухар сымал келбетиңди аядым

Оозун ачпай ооруп бүткөн жаранын
Ойлорумду жүрөгүмө камадым
Таарынбагын таттуу сөзүм укпасаң
Тамчы суудай тазалыгың аядым
Жаш экенсиң жаштыгыңды аядым

Көрүшкөндө көздөр тике карабай,
Эки мүнөз уяң өскөн баладай.
Жүрөк сырын жүзүбүздөн байкашып,
Баратабыз гүлдүү бакты аралай.

Биз ал күнү таанышканбыз жаңыдан,
Жарым карыш чыккым келбейт жаныңдан.
Аппагыңды көрүп алчы дегенсип,
Аңгыча эле жарк дей түштү чагылган.

Жарк дегенде неге сени карадым,
Жүрөк булкуп жайнап турду жамалың.
Дагы, дагы жарк дей түшсө экен деп,
Ошондо мен чагылганды самадым.

Басылганча туралы деп кичине,
Баш катабыз бир күрмөнүн ичине.
Ошол күндү дал ошентип өткөрдүм,
Эмне мынча сүйүү кызык кишиге?

Ажайып бала кезиң эсиңдеби?
Алгачкы кыялдарың сезимдеги.
Ак чөлмөк, топ ойночу алтын курак,
Айлуу түн нурун төккөн кечиндеги.
Ажайып бала кезиң,
Алгачкы ойноок сезим,
Жан кызым, ай, эсиңдеби?

Кайрылгыс балалыгым эсимде эми,
Карылар кобурашкан кечиндеги.
Жылдыздар жанган түндө уктабастан,
Сагындым сыр төгүшкөн кезимди эми.
Жылдыздар жанган түндү,
Сагындым өткөн күндү,
Балалыгым эсимде эми.

Уурдалган бала кезиң эсиңдеби?
Учурда удургуткан сезимдерди.
Өйдөлөп калган кезде карап алып,
Өзүмө окшоштурам, кызым, сени.
Укмуштай бала кезиң,
Унутта калбас эч бир,
Бала кезиң эсиңдеби?

Алтындай балалыгым эсимде эми,
Алгачкы аруу, тунук сезим деми.
Артылат кусалыгым эстеп алып,
Ажайып ал күндөрүм келбес эми.
Алтындай бала кезим,
Алгачкы аруу сезим,
Апакебай, келбес эми.

Өмүрдө менин арка жөлөгүмсүң,
Өзүмө Кудай берген өбөгүмсүң.
Өкүнүп өтө көрбө бул жашоодон,
Жан кызым, жандай артык,
Жан апам, жандай артык көрөрүмсүң.
Өмүрдө жөлөгүмсүң,
Өзүмө өбөгүмсүң,
Жанымдай көрөрүмсүң.
Апакем, жөлөгүмсүң,
Жан кызым, өбөгүмсүң,
Жанымдай көрөрүмсүң.

Бул турмуштун тартибине баш ийип,
Курдаш кыздар, келин болуп кеттиңер
Өз колунан өз оозуна аш тийип,
Курдаш балдар, эр-азамат жеттиңер.
Мен олтурам бүгүн тиктеп көчөнү
Биз баарыбыз чогуу жүргөн кечээги,
Ошол күндөр такыр эстен кетпеди.

Баарыбыз тең болбогон соң текши улуу,
Бир көчөгө чоң эстелик коюлбас.
Мен силерди дайым эстейм кеч курун,
Карып бара жаткан балдар моюндаш
Мен олтурам бүгүн тиктеп көчөнү,
Биз баарыбыз чогу жүргөн кечээги,
Ошол күндөр такыр эстен кетпеди.

Биз деги эми кайда гана барбайлы,
Кайсы жерге түшсөк дагы экчейип.
Картайганда канча курбу тандайлы,
Бири-бизге бири-бирибиз эстелик.
Мен олтурам бүгүн тиктеп көчөнү,
Биз баарыбыз чогу жүргөн кечээги,
Ошол күндөр такыр эстен кетпеди.

Сенсиң менин торгоюм,
Суук көздөн коргоюн,
Ашык болдум жалындап
Калпы болсо оңдоюн
Сенсиң менин торгоюм
Гүлдөй болуп соолбоюн
Ысыгыңа жылытчы
Суугуңа тоңбоюн

Сенсиң менин торгоюм
Күндөп-түндөп ойлоюн
Ишенип кой сөзүмө
Калпы болсо оңбоюн
Менин ырчы торгоюм
Жолугууну болжоюн
Алтынчы күн кадыр түн
Карап күтөм жол боюн

Сен торгоюм сүйгөнүм
Арнап өмүр гүлдөрүн
Бир басалы гүл бакта
Тыңшап торгой үндөрүн
Ырахат го жаш кезде
Күлүп-ойноп жүргөнүң
Саймалайлы жылдыздай
Жашообуздун түндөрүн

Жалын болуп чаркылдап
Чагылгандай чартылдап
Көл үстүндө ойногон,
Ак булуттай калкылдап
Канат күүлөп күү чалып
Ойноп-күлүп жаркылдап
Кадырлашып өтөлү,
Көңүлгө кир калтырба

Көңүл куруп күү чалып
Күлүп-бийлеп үн салып
Менин сүйгөн торгоюм,
Эмгек жолун бир чалып
Айыл ичин гүлдөтүп
Обон созуп ырдашып
Жаркылдаган жаштык кез
Кете электе кырды ашып

Өмүр суусун кечели
Жабык сырды чечели
Ак таң болуп нурданып
Аппак гүлдү терели
Ак нан болсо ыр болот
Сүйүп дайым жешели
Ден соолукта каткырып
Соо жүрөлү дешели.

Жүзүң сүйкүм жүзүмдөй, садагасы,
Жүрөгүмдү туюкка камабачы.
Окуучумдан беш бетер сүрдөп кетем,
Октой өткүр көзүң менен карабачы.

Карегиңден жолуңду издебечи,
Каалаганың катылуу ичте кезиң.
Сени сүйгөн бактыма ыраазымын,
Секетим ий, секетим ий, тиктебечи.

Күн артынан күн жылып өткөн сайын,
Күйүп-бышып жүргөнүң мага дайын.
Ансыз деле көзүңдөн көрүп турам,
Айта көрбө сүйөмүн деп, кагылайын.

Сырдашкым келет жаныңдан,
Сылагым келет чачыңдан.
Купуя айтсам билбейсиң,
Жыттагым кетет жытыңдан.

Азгырат көзүң сүзүлгөн,
Сүйгүм бир келет жүзүңдөн.
Кусага толуп жүрөгүм,
Кыйналып жүрөм сүйүүдөн.

Жолукпай кетсең кыйлага,
Жан дүйнөм чөгөт санаага.
Жүрөгүм эңсеп өзүңдү,
Кыссам деп сени кучакка.