Кар сапырган кыштын ызгаар аязында,
Кыялым бир гүлдөй, кооз талаасында.
Колтукташа басчу элем сени менен,
Көздөрүңдүн кымыңдаган карасында.
Кызгалдак гүлдөрүн, кызгалдак гүлдөрүн арнаймын сага...

Бой ыргаша аркы-терки, жалбарына, жалбарына, Болот кумар алар сенин жамалыңа, жамалыңа.
Жыпар аңкыйт теребел бүт, торгой таңшыйт,
Көктөм кандай көркөм, кооз, жыргалыма.
Кызгалдак гүлдөрүн,
Кызгалдак гүлдөрүн арнаймын сага...

Деңиздей шарпылдаган, демиңе улам тарттың анан
Махабат дайрасында кыялдар толкундаган.
Сүйүүдөн канат байлап, өмүрлөр тынбай агып барат,
Жаз болуп турам сага, жалбарып көзүң карап.

Кайырма:
Закымдайт сезим талыкпай, таңкы жарыктай,
Закымдайт сүйүү аралында чексиз бакыттай.
Төгүлгөн көздөр жашырбай, көңүл калтырбай,
Закымдайт дүйнөм кубанып, оттой жалындай.

Каалаган бир өзүңдү, калбаган назик көңүлүмдү,
Аярлап күтүп алчы, арналган жүрөгүмдү.
Бакыттын өзү кандай, караймын улам көзүм албай,
Зор майрам бар экениң, пейилиң сенин ак кардай.

Кайырма:

Сен кат жаздың, катыңда бар сүйүнүү,
Сезимдеги сырларыңдын түйүнү.
Сага бирөө жүрөк сырын ачканбы,
Сунганбы же бал катары сүйүүнү?

Сен кат жаздың, кубанычың батпаган,
Сүйүү мына ишеничиң актаган.
Бар байлыкты эми бекем сактай бил,
Бакыт деген бир ордунда жатпаган.

Кайырма:
Мен кат жаздым, тагдырыңа таарынба,
Башка түшөт кыйынчылык баарына.
Жашык болбо, сабырдуу бол,
Жазганы бар сенин дагы багыңа.

Сен кат жаздың, катыңда бар кусалык,
Калгандайсың кайгы-муңга тушалып.
Бир кездеги сүйүү балын таткызган,
Билинбестен кеткен экен уу салып.

Кайырма

Сырым сезген сырдашымдай жел мени,
Сыдырымга сылап жүзүм термеди.
Сагынычка толуп турган убакта,
Кандай рахат, көктөм жаздын келгени.

Келдиң мына, көңүл сырын эзгендей,
Күттүм сени жолугушчу кез келбей.
Жамгырыңды жөлөк кылдым жаныма,
Жабыкканым жалгыз өзүң сезгендей.

Кайырма
Жолуң тороп турса дагы жай алдын,
Жазды даңктап сүйүүгө мен даярмын.
Анткени ал кандай гана жагымдуу,
Элестетип кыздын назик жамалын.

Жан эргите булбул үнү угулуп,
Жаңыргандай жердин бети кубулуп.
Өзгөчө бир шаң коштуң сен жашоомо,
Өзүң менен келип жандуу сулуулук.

Шибер чөптүн жыты чыгып баш алып,
Табиятта тал чыбыктай жашарып.
Көктөмдүн бул ар бир аткан таңында,
Көңүлүм да барат улам тазарып.
Кайырма